18-2-2014 (農曆正月十九)
今日晏畫天氣回暖，氣溫超過二十度，仲出埋太陽，應該係釣魚嘅好日子；喺屋企同隻貓玩咗一陣，到五點幾就執埋釣魚架生，去街市買十零廿隻虾就直跴主場。
落到去見流水以起，咁就剩係開兩枝竿齋釣鱸；一入黑Ｄ北風就增強咗，仲明顯凍咗好多添，心諗今晚多數都係享受過程喇；過咗個幾鐘，Ｄ流仲行到澎澎聲添，我就用手收隻虾上黎，睇駛唔駛換過隻虾落去，拉上黎隻虾仲生猛過我，跟手掉番落去，咁樣郁一郁枝竿就有反應喇，竿頭比魚拉咗兩吓，跟住就成枝竿拉到彎哂，我一執起枝竿就順勢一抽，中咗！連攪幾野佢先發圍，頂咗幾秒就知唔係大野，都唔駛乜點就佢，一路順住收繩，好快就收到上水面，揾陣Ｄ，兩斤小鱸都用撈箕上水，解鈎落埋生扣，即刻落餌繼續。
一路又釣咗兩個鐘，Ｄ北風越吹越勁，其間只有隻大墨偷咗兩隻蝦食，其餘時間，兩枝竿郁都未郁過，唔係喇！有條魚交差就算喇，都係執野走人去宵夜好過，費事冷親又比大人哦喇！
都係得條兩斤鱸仔。
吹住大北風，有條鱸仔釣吓算係咁囉！
感謝 白果魚神 提供以上資料
白果魚神的網誌: http://a991952.blogspot.hk/
