細佬聽日生日，12歲大個仔喇！呢排我好多活動，今晚見抽到時間，就預早同佢慶祝，本來佢話想睇Keroro，因為我上年都有同佢睇，但奈何真係抽唔到時間囉！
不過一家人食餐飯就點都要，佢原先話想去酒店食，成家人都幾和味，重點係一定係我畀囉，一家人去近2千架喇喎，之後佢話意粉屋，但好似已經成日去囉，跟住佢話不如食日本菜，我當然唔會托手踭。佢仲想要多套無印筆，ok啦！
點知Daddy話樓下開左間中國會有自助餐，佢想試0下，媽咪細佬都無反對，咁咪去囉，去到先知原來逢五、六、日每位加10蚊，不過無所謂啦，但淨係得中式野，仲少野揀，我問佢地轉場好唔好，佢地又話可以試0下，算，當陪佢地囉！
講真，野食就唔算多，但ok0既，無哂都會轉新野，不過8點幾已經停新野喇，太早喇卦？！
呢d只係我地拎左其中一d野食囉！我地係拎到一檯滿架！
送的，每人一個，都ok好味！
又係送的，又係每人一碟，幾鮮味！
呢個都係送的，一檯一碟。
呢個拎的，整得好靚呀！
總括黎講，間野算係ok0既，因為價錢唔算太貴，但畀我揀，我都係想食返日本野囉！
今日有d唔開心，因為老公話次次都係我畀錢，無論邊個生日、咩節咩節，食就全家人食，畀就我一個畀，父母生日等都算，細佬生日請全家食飯，仲要禮物都我買埋，佢覺得果個係佢地個仔，無理由係咁。其實次次一請就要請成家係好金，但佢地係我屋企人我真係無乜所謂，細佬生日要求多多，我要一個人硬食，做佢阿爸阿媽0既都無表示，我都明老公講乜0既，不過佢地就係奉旨架啦，我已經慣。
講真果句，細佬生日同佢慶祝我好樂意，但佢又要咁又要咁，又唔會為我荷包諗0下，我無辦法做到佢想0既野就發我晦氣，其實心都幾酸，佢今日又要我請食飯，但仲想要有禮物加睇戲，仲話要0向我度住一排，我覺得係過份架，同佢講話我生日果陣佢一d表示都無，點解佢生日可以要咁多野，佢竟然答我：我有送野畀你架，我送左條毛畀你呀嘛，你無好好keep住咩？
我真係好想知咁0既細佬，係邊個教返黎架？成日話佢激到人嘔血，我認同，但真係好想有人諗下點解細佬會咁囉。
希望佢大大下會懂事d，唔好繼續越變越令人討厭，我真係好錫佢好想佢好，明明係醒目仔，點解會變成咁？有時成長環境真係好大影響，如果我無做好心理準備，真係唔會生bb囉，唔想累己累人呀。
