北歐極光夢想之旅@Day8 住進聖誕老人村

由 AABB遊世界於 2013-05-16 00:00:00 發表 | 累積瀏覽 383

分類：

Day 8 (2013-2-10 Sun) Kiilopaa to Rovaniemi, Santa Claus Village

〔行程：Saariselka –> Rovaniemi –> Santa Claus Holiday Village〕〔住宿： Santa Claus Holiday Village〕

由Killopaa去聖誕老人村嘅交通方法，之前寫得好清楚，我也不著墨寫太多。
【交通】Saariselkä (薩利色爾卡) ---> Rovaniemi (羅凡尼米)
【交通】Rovaniemi (羅凡尼米) ---> Santa Claus Holiday Village (聖誕老人村)

買Matkahuolto巴士票

不過實戰經驗係唔同ｄ，原來由Kiilopaa 去 Santa Claus Village唔洗咁轉折架，由Kiilopaa坐巴士去Rovaniemi，可以上車同司機講去Santa Claus Village，咁部車就會停在聖誕老人村對面。不過等巴士的時候記住準時，甚至提早到達。因為巴士不會停留，司機看見冇人拖行李就以為冇客，1秒都唔停就離開。我們差點就錯過左班車
，眼白白看著它離開。好在我地有預先買飛，酒店職員幫我們致電巴士公司，所以司機才折返接我們，否則，我們就要在Kiilopaa留多一晚了......好險！大家記住緊記緊記，特別是這些一天只有一班車的。沿途風景優美，記得抓緊時間好好欣賞啊。

中途補給站，停留7分鐘，俾你買下野，去下廁所。

搭車小tips：除了可以直接由Saariselka去Santa Claus Holiday Village，仲有班次時間嘅問題，大家都要小心留意。如果看不懂芬蘭文，最直接的方法就是聯絡入住的酒店/民宿，向他們查詢離開當日的班次。以我為例，事前查到11:15在Kiilopää有班車, 去到Rovaniemi，但原來2月10號那天14:05才有車在Kiilopää開往Rovaniemi，到達的時間是17:30左右。另一個溫馨提示：車上有暖氣，同車外嘅零下十幾度簡直是天堂和地獄，記得裡面唔好著咁多衫，唔係就熱死。我由上車開始除，由羽絨、頸巾、Fleece、最後除剩一件底衫，堆到成個位都係衫，好狼狽呀。

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

到了聖誕老人村，已經17:30，足足坐了3個半小時車。巴士停在對面馬路，行過對面就係Santa Claus Holiday Village！
大門商店閂左，我地搵左一陣先搵到個Reception。

第一件事就係Check-in先，職員非常親切及有禮，有問必答，講解亦清楚。
我們訂了帶桑拿小木屋，和網上看到的照片一樣，乾淨，舒適。
聖誕老人沒有答應我的願望，給我一間向北的房間，不過卻給我一間大單邊，比較寧靜開揚。

本來我地應該把握時間出去Shop行下或者買定post card返嚟寫，但係我地都太累了......同埋間房太舒服我地唔願出去，所以就玩煮飯仔。

我覺得自己好似肥媽個節目咁，將用剩嘅材料諗下可以煮ｄ乜！
材料有：通粉一包、洋蔥一個、碎芝士1/3包、煙肉、飛機上拎的調味包 (鹽、糖、胡椒粉、軟芝士、奶精)、一包即食麵湯粉。

製成品：煙肉芝士焗通粉，洋蔥湯
估唔到咁樣煮出來都幾好味，哈哈。
這是B小姐私房菜XD

食飽飽抖一陣，我地就出去碰下運氣搵北極光，順便行下。
天空太多雲，北極光就唔多見到，不過夜晚嘅聖誕老人村幾靚。