之前釣番黎D魚仔, 得幾條! 只可以用來煲湯!
不過煲比屋企人飲, 煲咩野湯好?
中式果D媽咪間中會煲吓, 不如煲西式.....周打魚湯啦!
周打是法文「Chaudree」的音譯，意指一個大鍋。據稱法國北部沿海漁村的居民，喜將蜆(或其他海鮮)、醃肉和牛油等一起熬湯，飲用時還加些麵包碎.
我以往做過周打粟米帶子湯. 今次大約跟從那些步驟及一些烹飪心得去處理一個簡易版.
材料: 魚, 蒜頭1粒(切成蓉), 洋蔥1個(切粒), 薯仔1個(切粒), 忌廉(或淡奶); 喜歡的話可加蘑菇粒.
1. 先清理魚魚, 用鹽"那"一"那"(約10分鐘), 沖水後抹乾並洒上麵粉.
2. 煎香魚身至焦香, 加入兩碗水滾起, 煲至乳濁色. 再將魚起肉連湯轉到湯煱內.
3. 另慢火爆香洋蔥. 當洋蔥開始稔身...
4. 加入蒜蓉及薯仔粒炒一會.
5. 加入兩碗水或高湯, 煲至薯仔稔身. 我較喜歡原味, 所以通常只用水. 再加入#2的湯煱內. 即有蒜蓉, 魚肉, 洋蔥及薯仔.
6. 用攪拌器攪勻, 加多一兩碗水去番熱, 熄火後再加入淡奶或忌廉.
(因薯仔攪溶後個湯會傑身, 可以隨喜好加多D水份)
若加蘑菇粒, 可在番熱時加入粒粒煲熟, 之後加入淡奶或忌廉.
用鹽及黑椒調味便成!
