又係一年一度食大閘蟹嘅時候, 素來鍾意喺屋企自已整黎食. 每年都食一兩次(因為實在太貴呢), 大多數都係喺銅鑼灣老三陽或者九龍城新三陽買, 今次豪D就去申聯, 申聯已往祇賣陽澄湖大閘蟹, 價錢貴D但質素好高. 雖然今年申聯都賣埋江蘇蟹, 但我地都係買陽澄湖蟹好D. 今次買左3隻每斤$440嘅蟹, 黃毛金爪, 青背白肚, 每隻約六兩半重, 共計$500大洋, 加埋一枝20年嘅太雕皇, 就係一個好滿足嘅大閘蟹餐啦.
20年嘅太白遺風太雕皇, 傳聞今年賣到斷曬市, 好在申聯仲有貨, $240大洋一枝. 酒身夠厚, 香醇復郁順喉好飲, 係食大閘蟹嘅好拍檔.
正宗嘅陽澄湖大閘蟹, 雖然得六兩半重唔算好大, 但蟹腳肉鮮香甜, 蟹膏豐腴稠杰, 入口軟滑甘香又膠口, 齒甲留香曆久不散, 好滋味.
飲完薑茶再整番碗水餃, 就飽飽喇.
瀏覽人數 :
感謝 大力 提供以上資料
大力的網誌: http://www.daileghk.com/
