探險家攻略 > 城中探秘 / 旅遊 / 美食之旅 > 特色景點 / 其他 / 長線旅遊 / 餐廳 > 紐西蘭南島10天自駕遊 (Day 3)

紐西蘭南島10天自駕遊 (Day 3)

由大力於 2013-02-10 00:00:00 發表 | 累積瀏覽 872

分類：長線旅遊餐廳特色景點特色街道其他；地區：其他

Day 3 : [皇后鎮(Queenstown) - Lake Wakatipu - The Mall - 箭鎮(Arrow Town) - Cromwell - Milton - 但尼丁(Dunedin) - Baldwin Street - 但尼丁火車站] 行車282公里

Novotel 嘅自助早餐好多野食, 中西日紐樣樣齊, 仲有原條三文魚配粥都算幾特別.

豐富自助早餐, 烤蕃茄同磨菇最新鮮好味.

紐西蘭必食名物, 原條三文魚配粥, 三文魚鮮香嫰滑, 滋味到極.

自制即榨紅蘿蔔汁, 4條甘筍先榨到一杯, 香甜好飲.

最後嘆番杯紐西蘭咖啡, 滿足也.

酒店出口有個玫瑰花園, 好多唔同顏色嘅玫瑰花, 又大又靚.

Lake Wakatipu, 紐西蘭第三大湖, 面對湖光山色嘅靚景, 喺沙灘行吓巳經令人心曠神怡,

William Gilbert係皇后鎮嘅建立者, 銅像位於The Mall入口.

黎皇后鎮必到嘅The Mall, 商店食店臨立.

The Mall 附近都好熱鬧架.

原來行吓行吓好快就見到吊車站.

驚人大發現, 亞洲雜貨店, 梗要入去掃貨啦, 入左大量零食同杯麵.

行完街沿碼頭行返酒店, 草地上有好多水鴨同海鷗.

坐古董蒸氣船同玩噴射飛船係呢度好受歡迎嘅水上活動.

行完皇后鎮返酒店攞埋行理 check out 走人, 其實有時間應該多留一日, 慢慢欣賞咁靚皇后鎮. 不過唔好咁貪心喇, set 好 GPS 向下一站箭鎮(Arrow Town)出發.

沿途經過有條橋叫 Arthurs Point, 過左之後兜落去睇睇, 天然環境非常之正斗, 好有魔戒所講中土大地嘅感覺.

呢度係比人玩噴射飛船嘅場地.

唔駛半粒鍾就到箭鎮啦.

整件條街滿佈商店, 我地都喺呢間糖果舖買左 Maunka蜜糖薑糖, 潤喉夾提神.

行左一陣又係時侯醫肚啦, 呢間 The Stables餐廳對住大片草地, 環境超正.

有冰水供應, 入口透心涼.

Seafood Chowder (NZD13.50) - 粟米忌廉湯作底, 海鮮粒粒都幾好味.

炸魷魚沙律(NZD16.50) - 炸粉好薄好鬆化, 魷魚軟熟鮮味, 茴香洋蔥醬汁香濃惹味, 超高水準.

食完野行吓條街Buckingham Street 嘅店鋪, 箭鎮早期係淘金嘅熱門地, 好多華人聚集嘅地方, 依加都仲有間金鋪喺度.

有間賣生果嘅檔口, 有好多款式嘅生果出售, 依加正值車厘子收成期, 試食左1粒, 又大又甜又多汁.

離開箭鎮繼續向下一站Cormwell 進發, 途經Kawarau Bridge, 係玩 Bungy Jump 嘅地方, 入去睇睇先.

碧水藍天, 環境超級正.

有人玩緊 Bungy Jamp, 好勁呀!

從呢個角度望落去都有D腳仔軟.

路上經過好多酒莊.

駛入去呢間酒莊睇睇, 一大片草地, 環境怡人, 可惜無時間, 如果唔係一定喺度食餐飯.

酒莊內種左好多薰衣草, 仲有好勤力嘅蜜蜂.

葡萄園係酒莊嘅命脈, 唔比人行入去年參觀架, 一串串葡萄掛在樹上, 開始有葡萄收成喇.

再揸半粒鐘就見到咁大個生果標記, 即係已經到達 Cormwell.

路過 Cormwell 梗係要D買生果食啦, 呢間個Menu幾吸引.

地方好大, 除左紐西蘭地產生果, 仲有果醬,果汁,果仁,蔬菜同雪糕出售.

買左車厘子(NZD7.50)同杏甫果汁(NZD3.50), 然後坐喺店舖後嘅草地上慢慢嘆, 紐西蘭車厘子又大又甜又多汁, 極品.

第一次見車厘子樹, 原來係咁樣嘅.

Cormwell 除左生果出名之外, 同樣有湖光山色嘅怡人美景.

沿途再向但尼丁(Dunedin)進發, 兩小時後經過一小鎮Milton, 停低抖抖.

喺Subway 買左個牛油果牛肉卷(NZD6.20), 味道唔錯.

再行多一小時就到達但尼丁, 第一站先去保雲街(Baldwin Street).

Baldwin Street, 全世界角度最斜(38.3%)嘅一段坡道. 行到盡頭約100公呎, 視野廣闊開揚.

去完Baldwin Street就去酒店Hotel St Clair check-in, 酒店位於海灘St Clair Beach旁.

酒店房間好寬敞, 簡潔又舒服, 露台對正 St. Clair Beach, 坐擁無敵海景, 正.

行吓St Clair Beach, 海灘上有好多人在玩滑浪, 有兩隻海鷗企定定喺鐵欄杆上, 真有趣.

晚餐就喺酒店內嘅餐廳 Pier 24食開年大餐, 呢間餐廳選用紐西蘭地產食材加上出式嘅Fusion廚藝, 喺紐西蘭獲獎無數.

Carrick Unrav Pinot Noir(NZD13.50) - 喺紐西蘭梗係飲番當地出產嘅紅酒啦, 呢枝重係呢區(Otago)酒莊嘅出品, 果香味濃, 醇厚易入喉.

Carrick Riesling(NZD11.50) - 同樣係Otago酒莊出品, 入口芳香微甜唔dry, 配海鮮一流.

Roasted Tomato Chowder, Clam, White Fish & Prawns, Toasted Fennel Seed & Lemon Cream, Grilled Ciabatta(NZD18.50), 另一種演繹方法嘅周打海鮮湯, 前兩次食都係用粟米忌廉作湯底, 以蕃茄作湯底類似法國嘅Bouillabaisse, 新鮮紐西蘭海產有蜆蝦同魚, 全部鮮嫩好味, 配以烤Ciabatta 意大利麵包香脆可口, 非常出式嘅精釆演繹.

Deep Fried Scallop and Twice Cooked Crisp Pork Belly with Fruit & Sasame Salsa Sauce(NZD21.00), 炸紐西蘭帶子外香脆內軟滑鮮甜, 豬腩肉先蒸後烤似廣東嘅去骨五層燒腩仔, 脆口有肉香, 伴黑白芝麻生果莎莎汁減低肥膩感, 好滋味嘅頭盤.

Seared Salmon Fillet, Cucumber & Crab Meat Ravioli(NZD39.00), 煎紐西蘭三文魚柳皮脆肉嫩, 入口甘香鮮味, 青瓜片清爽脆口, 蟹肉意大利雲吞充滿絲絲蟹肉, 伴香草忌廉汁入口鮮夾滑, 配搭得而嘅海鮮組合, 勁正.

Charcoal Grilled Medium Rare Beef Fillet, Wasabi Potato Mousse Cake with Honey & Balsamic Roasted Onions Sauce(NZD39.50), 炭火燒紐西蘭牛柳, Medium Rare火喉恰到好處, 外層好有炭燒香味, 內裹肉嫩軟熟, 肉汁豐盈, 另加一件Slow Cook嘅炆煮牛肉, 入口肉味濃郁又鬆化, 一牛兩食味道有唔同層次, 配Wasabi 薯蓉餅香軟好味夠獨特, 加一片炸芋片好有茶泡感覺, 高水準嘅Fusion菜式.

食原晚飯個天仲未黑, 揸架車出市中心行吓, 見到有個商場香旁邊有個中國花園好熱鬧, 泊好車就去睇睇, 原來係慶祝緊中國人嘅農曆新年, 我地仲喺大年初一見到財神添, 今次實發啦.

但尼丁火車站乃夜遊必到景點, 好寧靜同好宏偉.