最近得知高師傅重出江湖, 就喺灣仔一商廈樓上, 用番大喜慶黎做招牌, 地方比之前細好多, 少左點心同燒味, 多左D新派fusion菜. 我地最懷念反而係佢嘅傳統懷舊菜式, 尤其係蟹皇海虎翅, 第二度真係食唔到咁正. 所以今日黎都係主打懷舊菜先, 非常滿足嘅一餐, 下次再黎試埋其他菜式.
裝修同餐具都比以前嘅好, 地方細細大約有十張枱, 好有私房菜 feel.
蟹皇粗針翅($580) - 自今年起已經唔食魚翅嘅我都要為高師傅而破戒, 的確真材實料, 足二両翅, 好粗針同爽滑, 蟹皇煮得夠厚身, 香濃滑溜, 保持一流水準.
百花釀蟹拑($58) - 蝦膠鮮爽彈牙, 大大隻食得好過引.
上八珍扒大鴨($198) - 芥膽, 虎蝦球, 厚魚唇, 吊片, 冬菇, 金蠔全部都係優質材料. 鴨肉香腍入味, 滋味無窮.
奉送嘅紅棗蓮子糖水, 清香甜潤, 作為完美一餐嘅句號.
瀏覽人數 :
感謝 大力 提供以上資料
大力的網誌: http://www.daileghk.com/