早前和友人飯聚，閒談間說起現今旺角彌敦道一帶，有不少派卡片人士，阻塞道路，其中友人曾說，若果買碟，還會有專人帶路（吓，咁清楚，唔通佢幫襯過？），本人那時還反駁他說：「若果一天有佰多客人，那豈不是要有佰多人來服待？」，怎料今早閱報，始發覺友人所言非虛，以下為今早報刊的一段原文，標題為《打密碼敲門買鹹碟》。
好少跟碟王上鐵竇買碟，今次真係大開眼界。「前面班友仔咪係盲公仔囉，」同佢行到信和中心門口，碟王瞬即同其中一個卡片佬打眼色，話：「我哋跟住佢行，佢自然會帶路。」三人走入行人專用區，掟個圈出山東街再屈番入女人街，行到氣喘終於行到「沙X王」隔籬嗰間「泰X大廈」。呢幢唐樓好殘舊，門口窄窄，經過都唔覺眼，猶幸仲有（車立）搭，入（車立）撳八字，落番一層到七樓，喺走廊盡頭有個開住鐵閘但閂埋大門嘅單位，噓，終於到鐵竇嘞。
「各各──各各各──各各各各」，好搞笑！盲公仔居然打密碼敲門，使唔使咁誇張呀，家陣買鹹碟啫，又唔係走私，使唔使拍戲咁拍呀？「你咪理，入去揀碟，」碟王提醒我：「揀完就畀錢走，唔好講咁多嘢。」一百蚊七隻，睇封面好多都係舊碟，我求其買咗七隻叫做不枉此行，碟王揀得津津有味，埋單五嚿水，疑似老闆物體仲送多五隻畀佢添，搞到成袋碟，磚頭咁厚．．．
睇完上文，先發覺佢哋嘅聯絡方法咁原始，重要打暗號咁好笑，好彩冇問埋：「搵邊個？」，「呀蟲介紹我嚟嘅！」呢類暗語
![]()
。
============================================
感謝 甘蔗 提供以上資料
甘蔗的網誌: http://kentseky.blogspot.hk/
============================================
