今晚是平安夜，在此和各位說聲：「聖誕快樂！」。今晚個餐就未有著落，但就希望唔好好似2007年咁，整餐咁「正」嘅嘢畀我食就得啦。
話說在當天晚上，放工後乘地鐵出旺角，乘車時已發覺車內的人明顯的比平常多，直至抵達，一出車站只見四處人頭湧湧，始記起那晚是平安夜，不要說是看戲，就是簡單的一頓晚餐，也不知到何處吃才是。
四處尋找，無論是街邊的排檔、抑或是餐廳或酒樓，都要排上好一段時間才可進內，最後在銀行中心二樓，見現已搬遷的Delifrance尚餘小量吉位，連忙步進，以下為當晚與女侍者的對答內容：↓
筆者：「一位，有冇檯？」
侍者：「有，不過今晚係平安夜，最低消費要佰伍蚊，唔知有冇問題？」
筆者：「冇問題！」
（但個心就係度恁，梗係冇問題啦，唔通而家搭車返屋企煮杯麵食咩！）
侍者：「先生，呢邊！」
（先頭只要有個位就乜都冇問題，但一座定定就發覺好大問題，如果食開呢間，都應該知道呢道嘅消費大約係一佰蚊度！）
筆者：「係呢，小姐，請問有咩嘢可以食夠個佰伍蚊呢？」
侍者：「呢度有個餐牌，今晚有個聖誕大餐，價錢連加一大約佰伍蚊度！」
筆者：「（看了一輪，菜式都唔錯，見附圖）咁就呢個餐啦！」
故事至此並未結束，因為呢個餐就真係好睇唔好食，唔係話佢尐味道唔好，而係唔知點樣食佢至好！
這個餐先來個酥皮忌廉湯，湯的味道不錯，但個酥皮就真係不敢恭維，因為無論我用刀或叉點整，個酥皮始終黐實碗邊，點整都唔甩，用手又失禮，最後都係飲晒尐湯，淨低個酥皮係度。![]()
跟住第二個食唔到嘅餸就係釀蟹蓋，我好懷疑個蟹蓋係練過金鐘罩蒞，因為無論我用刀叉點整點篤，佢都係紋風不動，彈力十足，如果夾硬用牙咬，我又怕咬崩尐牙，搞咗一輪，最後都係放棄（唔知係咪佢地見我冇食，呢二年都唔覺有呢個菜出現呢？）。
個日好彩其餘尐食物冇事，如果唔係，睇怕食完呢餐，都要返屋企食多個麵至掂！
============================================
感謝 甘蔗 提供以上資料
甘蔗的網誌: http://kentseky.blogspot.hk/
============================================
