探險家攻略 > 美食之旅 > 餐廳 > 麵屋武藏虎洞 Menya Musashi Kodou：做事要做得一流，食拉麵要揀二流！

9 麵屋武藏虎洞 Menya Musashi Kodou：做事要做得一流，食拉麵要揀二流！

由山區麵包王於 2013-12-28 00:00:00 發表 | 累積瀏覽 1273

分類：餐廳；地區：尖沙咀

是次消費：每人平均約HK$ 150.00

早前曾參與過報紙讀者嘅試食活動而嚟到麺屋武蔵，上次就品嚐過店方多款小食及特色沾汁麵，餐廳環境及食物味道都印象極佳，最近睇雜誌知道佢哋又出咗款新拉麵，所以，又趁個悠閒星期六，拉埋老婆出嚟一齊試，有好嘢更喺益佢先啦。雖然全線麺屋武蔵都有供應，但首選當然揀尖沙咀海運店，因為上次嚟已睇中佢一排落地窗口位，入座時希望安排窗口位，故此都要稍等才可入座。

餐廳入門口位喺半開放式廚房加吧位，內裡仲有多排梳化卡位，而我哋揀嘅落地大玻璃窗口位，可飽覽維港景，冬日陽光照入嚟，既開揚，又舒適。只喺我望個方向，被隻郵輪雙魚星號「得住」，老婆個位就對住天星碼頭、中環一帶，景觀正得多。

未講碗新拉麵，先講少少小食，因為上次所試嘅沙律、小食都好味有特色，所以，今次都想試試其他款式，老婆揀咗蕃茄水牛芝士米紙卷，而小弟都算喺食肉獸，所以點咗牛肉年糕卷，兩款小食都甚覺特別。

蕃茄水牛芝士米紙卷 $53

依個新登場嘅米紙卷，顧名思義就喺西菜蕃茄水牛芝士嘅米紙卷版本，一客切成6件，賣相感覺鮮明爽朗，配合外間暖暖陽光，有種清爽怡人嘅感覺。其實個米紙卷配搭極西化，米紙卷內有蕃茄、水牛芝士、羅馬生菜，配以油醋汁，入口清新；水牛芝士亦放得唔手緊，軟綿綿嘅水牛芝士晌油醋酸香中滲出淡淡芝士香，而羅馬生菜及米紙卷令整個小食嘅口感富層次，軟綿中，又有爽脆同柔韌嘅感覺，真喺值得推介。

牛肉年糕卷 $36

金菇肥牛食得多，依個牛肉年糕卷第一次試，一客6件嘅牛肉年糕卷，總評就喺好食又抵食，6件年糕卷疊起成金字塔形，賣相精緻得比餐牌中嘅參考圖片更好睇。牛肉唔喺常見肥膏多多嗰啲肥牛，牛肉薄身軟腍，汁濃入味；內裡捲住日本年糕，軟糯煙韌有咬口，估唔到幾夾；再者，伴碟嘅鮮露筍仔，爽甜多汁，為道小食再加分，所以，又點可以唔再次推介吖。

講開露筍，題外話有個爛笑話想跟大家分享，知唔知「露筍」英文喺乜？講得喺爛笑話，答案當然唔喺asparagus啦，而喺lotion，咁「露筍仔」英文又喺乜？俾少少時間你諗，答案晌下面開估。

至於今次嚟麺屋武蔵嘅重點，就喺為個新拉麵「二刀流拉麵」，之前睇雜誌嘅介紹「獨門劍道之勢。二刀流拉麵」真喺幾吸引，兩條烤豚肋排喻意為宮本武蔵嘅著名刀法「二天一流」雙刀作戰，肋排以低溫70℃慢煮長達18小時，上枱前會再搽上一層秘製醬汁後炭燒，更採用日本店最著名嘅特製雙重湯底「濃厚豚骨湯加海鮮湯」，仲要期間限定，每日50食，所以睇完都心郁郁。

二刀流拉麵 $80

先講主角「烤豚肋排」，真喺好正，兩大條肋排甚有氣候，既慢煮，又炭燒，肋排外層焦脆有炭火香，而肉質非常鬆化入味富肉汁；麵條直身耐浸，食到尾都保持一定韌性，再者，湯底單睇已知足料，入口濃香鮮甜，隨著麵條滑入喉嚨都未夠，真喺邊食麵，邊呷幾口湯先夠喉；配料仲有溏心蛋、紫菜、筍乾及蔥花，溏心蛋不俗，蛋黃半凝，濃香柔綿，而筍乾爽脆，蔥花夠多啱晒我。烤豚肋排同特製雙重湯底，果然喺一流配搭！

凍抹茶咖啡 $22

老婆飲咗一啖，呻搵笨都無咖啡味，佢啱一半又唔啱一半喎。睇中文真喺有啲錯覺以為喺抹茶溝咖啡嘅「日式鴛鴦」，不過睇番佢英文Green Tea Latte，唔知會唔會俾到啲端倪。如果譯中文可能凍鮮奶抹茶合宜啲，將鮮奶打成奶泡再撞入綠茶中，綠茶味幾幽香，飲落感覺挺幼滑，將杯面嘅忌廉溝埋入去啲抹茶度，就更加綿滑。

兩公婆一至五日日做不停，偶爾晌星期六出街悠悠閒嘆個午餐，雖然唔喺上咩高級館子嚐一流食材，但絕對稱心唔「二流」。

「露筍仔」英文又喺Baby Lotion囉！

個人評分
味道：9/10
環境：9/10
服務：8/10
抵食：8/10
平均每人消費：HK$150

餐廳資料：
麵屋武藏虎洞 Menya Musashi Kodou
尖沙咀廣東道17號海港城海運大廈 LCX 3樓31號店
2735 8711

=============================================

感謝山區麵包王提供以上資料

山區麵包王的網誌: http://garycwm.blogspot.hk/

=============================================

鐘意SeeWide的分享，給我們一個Like吧！