舅仔搞結婚，想出尖沙咀睇吓場，開聲叫埋小弟幫吓眼，做姊夫嘅梗喺要撐啦，所以是晚就聯同埋未來弟婦（有啲話正式應該叫「舅嫂」，中式稱謂有時都幾複雜，好彩依家都直接叫名多），三人行嚟咗霸王山莊，唔喺晌度睇場，嚟醫肚啫！
唔經唔覺，原來主打京川滬杭菜嘅霸王山莊都開咗有成10年，一間店開得有咁上下年資，可以話基本質素都唔會太差，再者，晌小弟印象中，佢哋嘅出品都唔錯，屬中上之列。今晚嚟到，一入門口睇落都幾旺場，原來樓下已經滿晒，被安排坐樓上，仲好啦，無咁多人出出入入添。之但喺樓上嘅樓底比較矮，所以再晏啲人多就有點嘈雜喇。
樓上地方唔大，樓底較矮，人多時就會稍為嘈雜。
唔經唔覺霸王山莊都有10年！
餐牌部份菜式圖文並茂，而菜式分為8大類：冷盤前菜、豬牛羊、雞鴨、魚蝦、蔬菜、湯、麵飯、點心，大部份都列清楚喺邊度菜系。茶位收$10位，而小食收$5位（其實都喺得嗰一兜仔，不過就挺好食），另收加一服除務費，事不宜遲，快啲點嘢先！
餐牌中英日對照，大部份列明菜系。
![bowl]()
馬蘭頭伴豆乾 $66
滬菜嘅經典冷盤，記得上次食就嫌佢豆乾太少，少到唔覺，今次就好好多；而馬蘭頭依然刴得細碎，但不失咬口，不過，賣相就仍然咁老土俗套，哈哈。
![bowl]()
霸王小籠包 $35
舅仔喺小籠包死硬粉絲，所以一有小籠包就必叫。一籠有4件，睇外觀似模似樣唔失禮，外表呈半透明，夾起都見到包底湯汁盪漾。入口食得出皮薄，滿口湯汁，餡肉鬆軟，怪唔得舅仔都讚個小籠包幾掂啦。
![bowl]()
慈禧蒸素餃 $35
同樣一籠有4件，素餃包得摺紋清晰，薄得有少少透綠，賣相不俗。入口其實個餃皮都幾名薄，而且，餃內嘅菜碎亦都切得幼碎，味道清清淡淡，所以，估唔到依個喺川菜喎！
![bowl]()
黃金四季豆 $78
雖然川菜嘅乾煸四季豆喺本店招牌，亦都幾鐘意食，但往常都食得多，所以改改一試依個滬菜嘅黃金四季豆，其實舊年晌奧海城分店過一次。四季豆沾滿鹹蛋黃醬，非常惹味鹹香，當然瞻固醇都幾高，不過淺嚐無妨嘅。
![bowl]()
霸王炒飯 $78
屬杭州菜式，亦喺店中招牌推介，飯內裡有肉粒、火腿、金華火腿、菜度，加埋少少蝦米同肉鬆，單睇用料，其實唔算話好特別，但勝在飯粒炒得夠乾身、夠勻巡。
三個人計，其實都叫多咗嘢，不過，難得舅仔搞結婚嘢，食多啲高興吓，埋單？當然小弟請啦！
個人評分
味道：8/10
環境：7/10
服務：7/10
抵食：8/10
平均每人消費：HK$125
餐廳資料：
霸王山莊 Kings' Lodg
尖沙咀漆咸道南67-71號安年大廈地下
2723 1003
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
8
霸王山莊 Kings' Lodg：睇場請食飯
霸王山莊 Kings' Lodge (尖沙咀)
Italian Tomato Café (馬鞍山店)
嘉美軒精細潮州菜
彩晶軒 V Cuisine (荃灣分店)
Fish & Chick (西環店)
欣圖軒 Yan Toh Heen
恆河咖喱屋 Hin Ho Curry Restaurant
大戶屋 Ootoya (太古店)