5 石磨坊 Shek Mo Fong：糊糊塗塗

跟老婆晌丼丼屋食堂食晚飯，由於甜品一環唔多突出，只有幾款新地系列、千層蛋糕及班尼士，所以索性去石磨坊食糖水當飯後甜品。
石磨坊一直盤據太子、旺角，晌依兩區已經有成3間分店，較新一間分店卻落戶粉嶺，揀到咁遠，有啲摸不著頭腦，唔通因為租平？姑勿論點，太子旺角幾間分店一直都幾旺場，好似今晚晌豉油街分店，裡面就坐滿晒人，外面都有幾批人等位。不過，由於依類糖水鋪坐得逼逼夾夾，啲人食完即走，都喺快上快落，我哋等咗10分鐘就有枱。
餐牌第一版就喺「石磨坊推介」，當然要會一會佢啦，揀嚟朱古力蛋白燉鮮奶，貪佢夠晒古靈精怪，而翻去後幾頁，就喺石磨坊嘅手本嘢生磨靚糊，乜糊物糊就最啱我老婆。此外，餐牌都仲有好多選擇，涼粉、西米露、刨冰、傳統糖水、珍珠系列依啲都走唔甩，近年大熱嘅3.6牛乳布丁、綿花冰（石磨坊叫做冰花雪）都有，而較特色嘅仲有台灣九份系列，例如：地瓜圓、芋圓……等，以及幾款精選糕點。
朱古力蛋白燉鮮奶 $22
外觀麻麻哋，表面岩岩巉巉起晒泡泡，似喺燉好蛋白鮮奶後，就咁晌上面灑朱古力粉待溶，如果淋一朕薄薄嘅朱古力漿唔知賣相會唔會仲好啲。雖然口感挺滑溜，可惜燉蛋白鮮奶裡面嘅朱古力味唔喺好出，主要都喺靠面層嘅朱古力粉而矣，個人嚟講，覺得個朱古力蛋白燉鮮奶麻麻哋。
腰果糊 + 杏仁糊 $23
糊類產品又真喺幾多喎，果然喺「省招牌」嘢，芝麻糊、杏仁糊、栗子糊、腰果糊、合桃糊、椰子糊，但竟然無花生糊喎！本來兩溝糊都會晌糊面畫花，不過依家都「求求其」撈埋就算。個別而言，腰果糊同杏仁糊都幾香幾滑，不過，夾埋一齊之後又好似一般般，唔喺話唔好食，只喺兩者未有產生化學作用，可能杏仁味本身較搶。食糊，我都喺鍾意深水埗嘅綠林同甜甜地。
雖然兩款甜品都未有令我哋好滿意，但總算試到啲特別嘢，亦知道咁配法唔喺個好配搭。單以依兩個甜品計，真喺試一次就夠喇！

個人評分
味道：4/10
環境：4/10
服務：5/10
抵食：5/10
平均每人消費：HK$23

餐廳資料：
石磨坊 Shek Mo Fong
旺角豉油街66號地下
2398 9400

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================