0

8 Neway Karaoke Box:唔唱K.齋食Buffet

山區麵包王 於 2012-10-10 00:00:00 發表  |  累積瀏覽 8262

分類:其他 自助餐 ;地區:深水埗

是次消費:每人平均約HK$ 200.00

球場就去得多,K場就人生暫時去過兩次,無辦法,對於五音不全嘅小弟嚟講,低音上唔到高音,高音唱到走晒音,唱歌依家嘢真喺小弟死穴,俗語所講:獻醜不如藏拙。第一次入K唱,唔喺唱K,嗰時仲晌觀塘做嘢時,跟同事一齊入去食晏,唔貴又有個私人房,點講老細壞話都無有怕。至於第二次,亦即喺今次,同樣無打算唱K,只喺嚟食buffet,事緣表姪女生日,大個女唔晌麥記搞啦,表哥表嫂拉埋幾個同區親友,一齊嚟依間新間無耐嘅Neway,同佢開過生日唱K派對,小弟一向「咁錫」表姪女,成日惡形惡相問佢做晒功課未?溫好書未?當然有幸成被邀之列,今次都可以話喺另類邀請試食。
講番少少收費先,其實上佢哋個網都查到,小弟只喺剪貼一次出嚟:
午餐時段(11:00am-2:00pm):$52起(另收加一,學生免加一)
歡樂時光(1:30pm-8:00pm):$79/位(另收加一,學生人頭費九折)
黃金時段(5:30pm-5:45am):$149(自助餐 + $33/位)(另收加一,學生人頭費九折)
貓頭鷹(11:00pm-5:45am,只適用於一至四):$129/位(另收加一,學生人頭費九折)
而K-Buffet供應時間喺6:00pm-10:00pm,食嘢時間非常充裕,而且唱K又包兩杯非酒精飲品,房內有免費wi-fi,所以如果嚟唱K又食埋嘢,超級之抵,相反好似小弟咁齋食唔唱就有少少嘥料。此外,生日仲有優惠,就喺生日蛋糕一個免費送,多加一支汽酒添,所以,賀生日嚟開個房又唱、又食、又玩,絕對抵得諗喎。
佔地成萬呎嘅宇宙Neway,由於新嘅關係,啲環境、梳化及其他設備都比較新簇。我哋所訂嘅房都幾大,一行9人絕對坐得好鬆動。3邊喺梳化椅,4個小茶几,前後兩部大電視,坐邊位置都望到,啲親友同表姪女喺咁揀歌,一首接一首唱不停,我就晌出面搵食,睇睇佢個「環球K-Buffet」有咩好食,可是麻雀雖少,五臟俱全,有沙律、熱盤、自助火鍋、冷盤小食、凍海鮮、刺身壽司、潮州打冷、串燒、薄餅、煲仔飯、魚翅、中式點心、生果、甜品,果真幾豐富,雖然質素方面唔可以跟酒店嘅自助餐比,但小弟就覺得一啲都唔失禮,況且只喺俾多幾十蚊咋喎,依家晌茶記食個晚餐都唔得啦。
bowl沙律
簡單嚟講就喺罐頭沙律,除一盤沙律菜、一盤雜果沙律,粟米粒、雜果、龍眼肉、菠蘿、紅腰豆、都喺罐頭貨色,仲有一小碟青瓜,依度就喺沙律吧嘅全部,沙律醬及千島醬亦喺現成貨。所以,味道你可以預期到會喺點,有啲返回中學時那些年搞生日會所整嘅沙律,咪就喺罐頭生果加卡夫奇妙醬囉,哈哈!
bowl熱盤
一共十多樣熱葷,都有轉過一兩次款,計落有炒蜆、生炒骨、紅燒豆腐、豆豉雞球、蒜蓉蒸蟶子、芝士肉醬焗薯、章魚小丸子、炸芋餅、炒雜菌、炒麵、楊州炒飯、羊腩煲、豬腳薑……等,當中以蒜蓉蒸蟶子、芝士肉醬焗薯及羊腩煲為最驚喜啦,前者更喺可遇不可求,撞正有就你好彩,見佢出過一輪都好似無再出,或者有再出過就好快被人攞晒啦。芝士肉醬焗薯亦做得有心思,半挖空個薯仔,釀入肉醬再加芝士,正!羊腩煲夠火喉,羊腩羶味屬中度,但南乳味濃。至於其他嘅熱葷,好似炒蜆、小丸子、紅燒豆腐都做得不賴。
bowl自助火鍋
全場最佔位多都算喺個自助火鍋,湯底有兩款:麻辣湯、皮蛋芫茜湯,整法好簡單,晌右邊火鍋配料枱上揀啱想食乜,揀好放晒大窩滾水度,淥熟加番湯底就走得。其實火鍋配料都唔少,豬肉丸、腸仔、豆卜、蘿蔔、龍蝦丸、魷魚、水餃、雲吞、肥牛、什菌、生根、時蔬、公仔麵、烏冬……不過我哋個個都懶整,竟然無食過,哈哈!
bowl凍海鮮.冷盤小食
海鮮類有甜蝦、青口、翡翠螺,每樣都試少少,甜蝦同翡翠螺估唔到唔差喎,青口就瘦削啲;而冷盤小食包括有螺肉、牛展、豬耳豬頭肉、芝麻八爪魚、鴨腎5 款,小弟只拎咗螺肉、八爪魚、豬頭肉叫過吓口癮,來貨嘢唔好有太多期望。
bowl刺身壽司
難得較重成本嘅刺身都有,當然要幫襯多少啦。小弟就只喺拎咗三文魚、油甘魚、甜蝦同赤貝,味道唔錯,有啲想添食嘅衝動,不過眼見仲有其他嘢,所以食埋其他未夠飽先再算。壽司類因為太易飽肚就無錯喇,款式都唔少,有八爪魚、蟹棒、北寄貝、魷魚、熟蝦、玉子……等。
bowl潮州打冷
基本打冷嘢都見到有,如鹵水鴨(唔喺鵝)、金錢肚、墨魚、生腸、紅腸、豬大腸、豬紅、韮菜……,全部掛晒晌個檔口,有啲亦切好晒分類擺晌碟上,夾多少隨意。我哋夾咗啲返嚟一齊食,鹵水味唔算好濃好香,但還算入味,金錢肚份外好食,炆得夠腍。
bowl串燒
馬來西亞沙嗲串燒包括串燒牛肉同雞翼,雖然只喺用電烤爐,但一樣燒得甘香味美,唯沙嗲未夠花生香,但小弟覺得都已收貨喇,話晒佢哋又唔喺專做東南亞菜。另外,又有啲燒牛肉,細細片拎咗兩片,加啲洋蔥汁,亦唔錯喎。
bowl煲仔飯
煲仔飯製作需時,但又唔使企晌個檔口呆等嘅,佢哋嘅服務真喺做得幾貼心,好似拎嘢食,有啲要等嘅,如串燒、煲仔飯、魚翅…等,可以講低房號,整好就有專人拎過嚟。我哋點咗兩個煲仔飯一齊試,喺迷你瓦煲仔份量,一個蒸肉餅,另一個喺臘味,前者普通啲,後者就較香,有齊臘肉、臘腸、潤腸,真喺落足料架,飯粒也不俗,飯焦欠奉都只不過喺小問題啫。
bowl魚翅(金湯鮑魚絲蟹肉翅)
全場亮點,行親過去取食區,經理都鄭重捱介,檔口上面仲有張大大大海報介紹,以金華火腿熬個湯底,專人負責,有啲生滾嘅做法,有單先滾個湯,再加鮑魚絲、蟹肉同魚翅,撈一撈材料落足,認真有誠意喎。味道亦不賴,湯底鹹香有火腿味,一啲都唔流,鮑魚絲、蟹肉落得無手軟,魚翅就較為少啲,不過唔夠可以再添食吖嘛!
bowl中式點心
見佢檔口上海報印有多款點心:筍尖蝦餃、蟹肉燒賣、醬汁鳳爪、豉汁排骨、金錢肚、水晶餃、南乳豬手、奶皇包,問過之後喺不時輪住咁出,但由於點心都經常食,所以就無叫過。
bowl生果.甜品
果盤只有西瓜同蜜瓜,簡簡單單兩款當飯後果都OK 啦。甜品款式唔算多,亦唔喺咩高質出品,都只喺啲雲石芝士餅、意大利芝士餅、林明頓蛋糕、曲奇、迷你果撻、芒果布甸、啫喱,對於都算喺甜食一族嘅我,見佢唔多,好好醜醜都試勻佢啦,喺無食紅豆糕同綠豆糕,因為影相時見有,後尾想食時就無晒。食完印象就唔深架啦,但又唔喺差嗰隻情況,中肯一句,就喺中規中矩。
bowl生日蛋糕.蜜桃汽酒
生日嘅小優惠,一磅裝芒果忌廉蛋糕一個,賣相唔跩,只喺似屋村餅店嘅水平,但海錦蛋糕亦都算鬆軟,喺忌廉多啲啫;蜜桃汽酒一支,幾香桃味,汽酒好處喺酒精度唔高,細路都啱飲。
成晚唔停食,不過就不停被問揀首歌唱吓,應酬吓大家,結果揀咗克勤首紅日,夠快,好似背急口令,唱錯都唔覺囉!最後,祝賀表姪女生日快樂,學業進步,越大越乖啦!

個人評分
味道:7/10
環境:8/10
服務:8/10
抵食:9/10
平均每人消費:HK$200

新時代卡拉OK Neway Karaoke Box
深水埗青山道170號宇宙商場2樓
2708 8100


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

鐘意SeeWide的分享,給我們一個Like吧!
  • 攻略日期:N/A
    攻略地點:深水埗
  • 攻略時間:3-6小時
    是次消費:每人平均約HK$ 200.00
Neway (深水埗宇宙商場店)
地區:
消費:
$200
分類:
卡拉OK
8
46935
Hundred Party
地區:
消費:
分類:
1565
Cloudbase
地區:
消費:
分類:
1281
Neway (旺角創興店)
地區:
消費:
$1-$100
分類:
卡拉OK
17515
Neway (旺角中心店)
地區:
消費:
$1-$100
分類:
卡拉OK
9723
Neway (油麻地富運商業中心店)
地區:
消費:
$1-$100
分類:
卡拉OK
14998
Neway (佐敦彌敦道店)
地區:
消費:
$1-$100
分類:
19915
RedMR 紅人派對 (灣仔店)
地區:
消費:
$101-$300
分類:
卡拉OK
16476
0人比"掂"

最多能輸入300字

累積瀏覽 1185181

全部攻略 1025

全部回應 146