國慶日，太太教會搞咗個大澳大旅行，人強馬壯百幾人，包晒車往返（回程東涌解散），晏晝安排晌大澳福滿林酒家食個特惠旅遊團體餐（因當時有啲唔方便，無影相，食評就無謂寫喇，不過總結幾句，碟頭大，份量足，價錢平，質素中等，算抵食），7餸1湯白飯任裝食到飽。期間節目跟大隊行山又得，閒遊大澳市集又得，走去警署舊址大澳文物酒店都得，總之悉隨尊便自由行，想點就點。
早上跟大隊行山，回程逛遊市集，果然有好多地道小食，例如碳燒扇貝生蠔、蝦豬餅、茶果……等等，如非一個鐘後就食晏，「掃街」都可以食個飽。不過，今日天口仍然頗熱，行完山又有點累，最好搵個地方歇歇腳，可以坐下，又可以食少少唔飽肚嘅小食，撞啱「正記」，又有棚屋尾後嘅半露天位，一於入去打打躉唞一唞。
假日嚟喎，何解咁靜？
正門位都有幾張枱，唔多客，以為無乜人幫襯，穿過「正門大廳」、廚房，就喺鋪尾棚景，嘩！原來啲客逼晒晌度，咁講真，俾嘅價錢一樣，但「後欄」景致豁然開朗，有山有水，望住一連串棚屋，感覺正好多！
特別推介：「鋪尾棚景」。
正門座地招牌寫住：「豆腐花、薑汁撞奶、芝麻糊」，可能喺鎮店三寶，薑汁撞奶同芝麻糊幾時都覺得喺熱食最好，小弟都行到一身汗，仲成身熱，梗喺要食啲涼快嘢啦，凍豆腐花系列就最合心水。正記有多款豆腐花，配配薑汁、芝麻糊、紅豆、涼粉、雪糕，最搞嘢有款叫「招牌涼粉」，喺紅豆、涼粉、雪糕、豆腐花溝埋一齊，有啲匪夷所思，我仲有半日玩，無謂亂試。結果小弟點咗紅豆豆腐花，老婆飲樽紫貝天葵茶就可以喇！
「開放式」廚房，去鋪尾必經之路！
![bowl]()
紫貝天葵茶 $10
$10一支大大樽，酸酸咪透心涼。其實晌大澳有好多檔口仔都有賣紫貝天葵同洛神花茶，兩者都好鬼死似，紫紫紅紅咁色，好奇之下問過其中一個檔主，佢話色深少少嗰樽喺紫貝天葵茶，清熱解毒；淺少少嗰樽喺洛神花茶，幫助消化降三酯，點都好，總好過飲汽水啦！
![bowl]()
紅豆豆腐花 $18
凍豆腐花細細碗，幾夠豆味，但就唔喺好滑，如果食熱嘅唔知會唔會好啲？紅豆一大堆晌豆花面，幾甜幾有紅豆味，可惜煮得未夠透，賣到$18真喺覺得有點貴，不過，加埋佢有個靚景，食完又唔會趕你走，當補番數打個和啦。
每張枱有個號碼，枱上嘅落單紙亦寫咗，剔好交俾廚房等食，貨銀兩訖，一手交一手，食完拍拍「籮柚」走得！
個人評分
味道：6/10
環境：8/10
服務：5/10
抵食：5/10
平均每人消費：HK$14
餐廳資料：
正記
大澳大澳吉慶街82號
2985 7301
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
