7 牛記火鍋大排檔：秘竇嘆羊腩、嚐雞煲

由山區麵包王於 2013-12-27 00:00:00 發表 | 累積瀏覽 3787

分類：火鍋；地區：屯門

是次消費：每人平均約HK$ 150.00

繼早前跟同事「路過」屯門，晌屯門時代廣場試過丸龜製麵，估唔到事隔無耐，又跟老友入到嚟佢個秘竇「打鞭爐」，點解講秘竇？如果唔喺老友帶，真喺邊識嚟，亦真喺唔知屯門工廠區原來有個熟食中心。依個秘竇名叫牛記，位處工廠區嘅建業街，一入夜，靜過鬼，其實離西鐵站唔遠，步行15分鐘都可以，一出站都望得見個工廠區，總之一邊「光撐撐」喺市中心，另一邊「黑媽媽」就喺工廠區。

個場基本上管理幾好，地方企理，又夠乾淨，絕不地踎，可以講得好過一啲又逼又窄，令人坐得唔自在嘅大酒樓。所以，當晚所見，仍見到唔少街坊客支持。

雖然依類工廠區內大排檔嘅服務對象都喺附近嘅工友，其實，如果政府管理好啲，配合啲推廣，好似新加坡、馬來西亞啲熟食大牌檔咁，又豈止工友會嚟，直頭成為遊客必到嘅景點啦，使鬼搞咁多區區有景點咩！可惜，因為只喺個工友飯堂，所以入夜較靜，兜咗個圈，晚市只喺得番兩個大牌檔有開，一間叫牛記，另一間叫發記，分別各據整個熟食中心頭尾。

講明入嚟打鞭爐，所以目標清晰，火鍋類別有唔少，招牌菜嘅秘製羊腩煲已經喺朋友嘅內定。其他選擇仲有新鮮豬骨煲、胡椒豬肚雞煲、清湯牛坑腩鍋、花彫醉雞鍋、重慶麻辣雞煲、椰子雞鍋、奇味雞煲共8款，而且，有大有細份量，可按人數多寡而定，夠彈性。至於火鍋配料有成50多款，明碼實價，詳情唔多講，影低餐牌自然一目了然啦！

招牌秘製羊腩煲 $248

基本份量有足1磅羊腩，加送肥牛一碟（只喺普通級別$50一碟嗰款），若然喺羊痴驚唔夠喉，可點加大份量（$398），有成兩磅羊腩，估唔到份量好足。而煲底加有竹隔，邊食邊滾永無黐底。

羊腩炆得頗鬆化，外皮帶點煙韌，羊羶味屬中等，汁底好濃香。羊腩之下原來有唔少配菜：馬蹄、枝竹、蘿白、沙葛，沾滿羊腩汁，幾難話唔好食。

奇味雞煲 $128

雖然近年重慶麻辣雞煲大熱，不過，出於「奇味」兩個字，對個奇味雞煲份外好奇。到底會喺奇味？定會喺怪味呢？同羊腩煲一樣，有大有細份，$128個價錢喺細份，即喺有半隻雞，但店員話已有成斤半重，3-5個人都好夠食，此外，每個煲都附送新鮮蔬菜一碟。而大份就賣$218，足3斤鮮雞一隻。依家雞價咁貴，唔喺活雞，就算冰鮮都抵食，況且，奇味雞以醬料炆煮，新鮮、冰鮮出嚟效果應該都分別唔大。

估唔到啲雞肉幾滑，而且醬汁好惹味，香香濃濃，雖然唔知啲醬汁有咩成份，但配料不少，有蕃茄、乾蔥、蒜頭、蘿蔔、紅椒、青椒……等等。「奇味」，大抵唔喺奇怪嘅味，只喺令人食得出奇咁好味。

以上兩款火鍋都屬味濃之物，加碗金鳳牌靚白飯（$10）撈汁，認真一流。朋友話咁都食得出喺金鳳牌，唔喺食得出，喺睇得出，見個價錢牌喺咁寫，信佢喺用金鳳米啫！再清埋隨雞煲附送嘅生菜，就算唔再點其他火鍋配料，一樣可以滋味滿足。食火鍋，配冰凍汽水始終喺個人心理組合，可惜只得支裝可口可樂及玉泉忌廉，此外，仲有多款啤酒供應。但題外話，店方有部份嘢需要外來收費，例如自携紅酒、火鍋灼料、海鮮……等等。

雖則喺大牌檔，環境喺街邊風味，但個個店員著晒制服，唔單只店員人數比例多，做事快手快腳，招呼不俗，斟茶、換碟做番足！況且，無茶芥，又無加一，大牌檔可愛之處就喺實實際際。

個人評分
味道：8/10
環境：7/10
服務：7/10
抵食：8/10
平均每人消費：HK$150

餐廳資料：
牛記火鍋大排檔
屯門建榮街32號建榮大排檔10號
6497 8008

=============================================

感謝山區麵包王提供以上資料

山區麵包王的網誌: http://garycwm.blogspot.hk/

=============================================

鐘意SeeWide的分享，給我們一個Like吧！