講番少少上文提要，因為入秋天氣涼咗，兩公婆一時興起走咗入長洲行吓，晌長洲嘅西南面兜咗個大圈，買完用嚟送俾親戚嘅一大袋海味之後，返回碼頭都時近旁晚，結果晌碼頭附近內街「得得好店」食完個「下午茶」之後，距下一班大船仲有啲時間，再想食啲甜品先走。今日行咗一大輪先知原來長洲有咁多甜品鋪，不過多數都喺啲生果撈，但食甜品嘅目標清晰，記得有間「師妹甜品」頗有名氣，雖然事先無計劃嚟，最終都想起依間小店，就過嚟食埋件凍餅先上船。
因為「提早」食晚飯，過嚟「師妹甜品」都未夠7:00pm，客人就只有我倆，正正連店主都啱啱準備開飯。店內一室黑色為主調，裝修簡約，入門口右邊喺餅櫃及廚房，左邊用餐部份大概容納20人左右。
揭揭餐牌，好快就有心水，蜂蜜、豆腐、朱古力都喺老婆嘅喜好，小弟就乜都啱嘅，所以，毫無懸念之下就揀到心目中嘅選擇。餐牌上有段溫馨提示：「小本經營，敬請堂食客人每人惠顧一款食品或飲品」，確實，依家搞間小店唔容易，都希望幫襯嘅人都識做，盡量配合下啦！
飲品
食品
溫馨提示
![bowl]()
蜂蜜豆腐蛋糕 $22
淡黃襯白，加片薄荷葉，外型清新爽朗，如女孩柔情似水。底層墊以海綿蛋糕，雖則薄薄一片，仍感受到鬆軟有彈力；中層喺豆腐慕絲，口感絲柔軟滑，但略嫌豆腐味唔突出，有點隱約；反而上層嘅蜂蜜啫喱，滲出幽幽蜜香，令人感覺柔和。
![bowl]()
特濃朱古力榛子蛋糕 $25
先總結一句：「超推介」，單睇賣相，$25絕對收得抵，點抵？一層又一層，足足9層（4層海綿蛋糕、4層朱古力慕絲、1層鏡面朱古力），外型剛烈沉實，仲要層海綿蛋糕切到鬼咁薄，好考功夫。而整件蛋糕朱古力味非常濃郁，又帶有榛子味，面層嘅鏡面朱古力做得平整幼滑，最畫龍點睛嘅喺內裡加入埋榛子粒，口感得以升多兩級。伴碟嘅焦糖漿，豈非裝飾咁簡單，將蛋糕再沾少少焦糖漿，將濃郁香甜嘅味道再提升多一個層次，點可以唔超推介。
兩件蛋糕夾埋都只喺區區$47（晌市區出面食一件有質素嘅都要四十啦），就試到食材嘅配搭，店主嘅手勢，創作嘅心思，再入嚟長洲嘅話，會再支持「師妹」囉。
個人評分
味道：9/10
環境：7/10
服務：8/10
抵食：9/10
平均每人消費：HK$24
餐廳資料：
師妹甜品 Katie Dessert
長洲建新里12號地下
9880 3726
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
8
師妹甜品 Katie Dessert：剛柔並重
師妹甜品
旮旯 The Glock
旮旯 The Glock
入素 Green entrance （KCC）
T.O.P.商場地庫
La Famille (海港城海洋中心店)
澳門英記餅家
滔滔甜品(井財街)