荃灣喺小弟同老婆晌星期日搵食嘅熱點，好多時候都唔會話食貴嘢，幫襯小店居多，依餐返完教會後嘅「晏仔」，就選址於阿Pi，就喺隱於華都中心嘅Pi Hot Dog，唔喺講套戲（少年Pi的奇幻漂流，套戲睇過，個故仔又真喺幾奇幻，而有啲場景拍得認真好靚）。之前去荃豐、華都、荃昌依幾個串燒商場食嘢時，都有留意過依間Pi，裝修摩登簡約，門面裝晒燈光招牌，晌個商場內佢算非常搶眼。但喺當時經過見人多未有幫襯，等近日「人潮」稍退先嚟幫襯，再者，現有多篇食評做參考，可部署吓食乜好。
荃豐、華都、荃昌有好多小店食肆，部份都幾具質素，所以要突圍都唔容易。Pi睇名就知喺主打食熱狗，其實佢定價以依區嚟講唔平，一客熱狗單點平嘅要$25，貴起上嚟索價$43，加杯餐飲就三、四十，貴過快餐店。夠唔夠韌力，相信好睇會唔會不時推新產品嚟吸客。
入內晌廚房上面有個大餐牌，不過兩側牆身「貼」咗仲多張餐牌，有相、有價錢、有介紹，一目了然。其實兩側牆身喺啲鐵板，餐牌加咗磁鐵，做到可以用磁力黐上牆，極有趣又實際嘅做法。底面兩頁餐牌，唔好見佢幾十款熱狗，睇到花多眼亂，查實只喺分咗3大類：D系列，熱狗（Hot Dog，D1-D12共12款，全部都只賣$25）、C系列，車打芝士熱狗（Cheddar Dog，C1-C15共15款，價位差距大啲，由$30-$43），另外仲有兩款DD系列，特級熱狗（Deluxe Dog，DD1同DD2，都喺賣$43），幸好惠顧任何熱狗，可享半價購買手調飲品一杯，或$3折扣優惠購買樽裝飲品。此外，仲有其他包點同飲品可供選擇。
![]()
|
|
C系列車打芝士熱狗
|
![bowl]()
D10-泰惹味熱狗 $25
D1-D12嘅熱狗，均配法蘭克福腸搭老闆自家調製嘅滋味醬汁，例如：草莓沙律醬、山葵沙律醬，再加入不同配料。如需轉腸，須另補差價，不過睇勻餐牌及鋪內所有地方，都唔見邊度有講轉腸要補幾多，所以要個別咁問店員先得。熱狗除夾帶大大條法蘭克福腸外，主要配料仲包括幼青瓜條同洋蔥燒雞醬，味道帶微辣，少少酸，令人覺得開胃啲。包身烘得微暖，但就唔夠香脆，底面再烘多陣效果香好多；法蘭克福腸亦都唔錯，腸衣烤得脆。
![bowl]()
C15–三響炮芝士狗 $43
C系列嘅熱狗表示加入咗車打芝士，而C1-15唔同款式嘅熱狗就用上唔同嘅腸，好似有法蘭克福腸、紐倫堡香腸、脆皮芝士腸、瑞士蘇碧力腸、匈牙利腸、兵加腸、香辣燒烤腸、荷蘭腸、黑椒腸、墨西哥、早餐腸……。而依個三響炮顧名思義，包含咗3款腸：法蘭克福腸、早餐腸、兵加腸，當中仲加入咗煙肉粒，多份鹹香。算小弟孤陋寡聞，早餐腸、兵加腸都喺第一次聽，但又幾好食，前者似喺煙燻過嘅雞肉腸，後者就似一般豬肉腸，口感上覺得料足夠肉地，唔會一口粉咁。最正自不然鋪滿溶透嘅車打芝士，份外美味！
![bowl]()
凍榛子鮮奶咖啡 $30
反而飲品類又有好多嘢揀喎，咖啡、茶外，有沙冰、果汁、維他命水、有汽果汁同新鮮粟米汁。小弟就揀咗杯榛子鮮奶咖啡，店員介紹話咖啡同朱古力飲品，均用上Mövenpick嘅出品炮製，咖啡味幾香濃，最正喺超強榛子味，啱晒我呀！
熱狗以外嘅選擇，仲有其他包點、飛碟、沙律之類，不過，既然香腸全由歐美入口，別具風味，當然嚟到以食熱狗為首選。原來仲有甜品，見佢個凍櫃放有焦糖奶凍，別無其他，應該喺是日甜品喇！
個人評分
味道：8/10
環境：6/10
服務：7/10
抵食：7/10
平均每人消費：HK$42
餐廳資料：
Pi Hot Dog Gallery
荃灣華都中心商場一樓44及49號舖
2417 9363
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
