開始入秋，見天氣涼咗，兩公婆一時興起走咗入長洲行吓，因為完全即興，無任何計劃、行程，隨意行，咩都隨遇而安，反正，一心只喺想輕鬆渡過個周末，無謂傷自己腦筋，嘥時間度行程！結果，晌長洲嘅西南面兜咗個大圈，由碼頭行經長洲西堤路，再去張保仔洞，上山搵五行石，行過埋長洲火葬場、墳場，仲有長洲居屋雅寧苑，然後落返大街，依條誤打誤撞嘅路線認真好嘢睇，哈哈。雖然咁，去到傍晚肚餓都要搵食架，路經碼頭附近內街嘅「得得好店」， 心血來潮，又好想試依間嘢，睇佢喺咪真喺「得得好掂」。
內籠茶記一間，裝修街坊，但絕對企理整潔，一個阿姐睇晒樓面，而客人（應喺街坊）竟然絡繹不絕，睇落幾得街坊支持。
雖時近傍晚，都仲有下午茶供應，當然慳番少少點兩個下午茶餐好啦！餐牌上有好幾個系列下午茶，另外門口黑板上又有其他炒粉麵下午茶餐，最後，我哋點一客麵食，一客炒飯，就順便當埋今日晚餐。
![bowl]()
長洲魚蛋河 $29（下午茶餐價）
魚蛋外貌好唔同，有啲似無炸過嘅「炸魚蛋」，又有少少似鯪魚球咁樣，食落好濃魚味，外皮少少煙韌，不過內裡又唔算好彈牙，口感好特別。而湯頭幾香幾鮮，我嘅味精檢測專員，即喺我老婆，話應該無下味精，配合滑溜嘅河粉，實在不俗。
![bowl]()
艇家炒飯 $39（下午茶餐價）
一個小炒鑊盛上，飯量認真唔嘢少，點依個炒飯旨在純粹想知吓佢喺咩嚟。味道唔錯，炒飯爽身唔油，而材料豐富，有蟹柳、蝦籽、蝦皮、鹹蛋黃、蛋絲，口感豐富，又有微微薑味，真喺頗特別，又幾好食。
邊食邊發現，牆上有個介紹牌仲有列出多款炒飯，好奇之下問問阿姐，阿姐勁，反應迅速即時回答出喺咩嚟。原來長洲炒飯喺蝦乾、鹹魚、鮮蝦加蝦醬嘅炒飯，可預期喺鹹香惹味嘅一道炒飯；而細路仔炒飯你又估喺乜？聽完佢介紹絕對令人會心微笑，其實就喺菠蘿、腸仔加蕃茄炒飯，有點西炒飯嘅影子，但勝在個名得意。其他仲有潮州炒飯、星洲炒飯（唔喺炒米喎）、印尼炒飯、泰式炒飯、XO醬海鮮炒飯，實在堪稱炒飯之王。
![bowl]()
凍咖啡（跟餐+$2）
行咗一大輪山，有啲熱，所以點番杯凍啡涼快下，咖啡味一般，而味道偏甜。
除咗杯咖啡，啲嘢真喺幾掂！食完飯，距下一班大船仲有啲時間，記得有檔「師妹甜品」，晌長洲都幾出名，所以臨走時會一會師妹，食件凍餅後先上船。
個人評分
味道：8/10
環境：6/10
服務：8/10
抵食：8/10
平均每人消費：HK$35
餐廳資料：
得得好店茶餐廳
長洲海傍街91C地下
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
