探險家攻略 > 購物 > 飲品美食 > 東海堂 Arome Bakery：特薯任務

8 東海堂 Arome Bakery：特薯任務

由山區麵包王於 2014-03-14 00:00:00 發表 | 累積瀏覽 2844

分類：飲品美食；地區：中環

是次消費：每人平均約HK$ 20.00

一向都幾鍾意東海堂啲產品，因為用料及質素一直都保持水準。一時興起，又想食件凍餅激勵一下自已，因為工作遇到少許阻滯，但自從近中環地鐵站嘅分店摺咗之後，要幫襯就要走到過去香港站嘅分店，極為唔方便，真喺晌公司行過去嘅話，跟去金鐘嘅分店相差無幾。

趁幫公司過開去銀行入票，為時尚早，未到食晏時間，所以，唔單只餅櫃仲有好多款式，而且又未多客，大可以慢慢揀。之不過，無理由淨喺買自已一份嚟下午茶架，故此，多買兩件拎返屋企，同老婆一齊慢慢嘆，順利完成依次特殊任務。

焦糖卷 $14

小弟一向喺焦糖、拖肥粉絲，所以，晌餅櫃一見依款焦糖卷，就二話不說唔使多講，就喺佢。朱古力卷蛋加上焦糖鮮忌廉，簡單唔花巧，而卷蛋軟綿，忌廉挺身而柔滑，又帶點焦糖香，非常好食。再配番杯咖啡，頓時感到一份寫意。

芒果吉士撻 $18

吉士撻系列都已經出咗好耐，依家都仲有得賣，證明仲有市場，6款吉士撻裡邊已試過栗子吉士撻及白桃吉士撻，而此刻呂宋芒當造，相信揀芒果吉士撻應該上算。牛油撻底十分鬆脆，撻殼之上鋪有一層朱古力漿及海綿蛋糕，阻隔水份滲腍撻殼。中間嘅吉士忌廉做得軟滑，跟住就喺鋪到滿滿嘅芒果粒，多得絕無欺場，最緊要啲芒果粒夠熟夠甜嘛。

沖繩紫薯撻 $20

沖繩紫薯系列喺由上年年尾嘅新推產品，賣點喺用上100%沖繩紫薯製作，兼且標註著日本農林水產部使用推薦。將個沖繩紫薯撻分開兩半，清楚睇到有幾多紫薯，紫薯蓉質感軟綿，富蕃薯香，加上外形典雅，唔怪得都仲喺店方嘅熱買。此外，下面加有朱古力海綿蛋糕及牛乳忌廉，再配牛油撻底，同樣令味道豐富，口感多變。

試過3款甜品之後，仍然對東海堂嘅出品投下信心嘅一票。有時候，都唔一定要花四、五十蚊先可以食到滋味靚餅嘅，中價嘅一樣有好多選擇，最緊要喺你有無用心去感受！

個人評分
味道：8/10
環境：7/10
服務：8/10
抵食：8/10
平均每人消費：HK$20

餐廳資料：
東海堂 Arome Bakery
中環港鐵香港站28號舖
2530 4238

=============================================

感謝山區麵包王提供以上資料

山區麵包王的網誌: http://garycwm.blogspot.hk/

=============================================

鐘意SeeWide的分享，給我們一個Like吧！