8 Koh Thai：泰味濃情

年廿九食團年飯，年初二就食開年盆菜，咁年初一晚食乜好？咪食情人節晚餐囉，咁多年嚟，同老婆都有共識，唔會晌情人節正日出去食大餐，因為我哋都喺啲實實際際嘅人，無謂被人鋸啦！所以，通常會早幾日去食，今年嘅情人節夾住晌農曆年後，故此咪揀咗晌大年初一依晚慶祝囉。

近排有啲運仔，早前晌一個飲食網站ufood玩啲寫食評遊戲，中咗個黃金海岸酒店聆渢咖啡廳嘅燕窩自助晚餐，嗰晚不知食得我哋幾滿足，試到好多特色菜，又嘆咗好多甜品；今次嘅情人節晚餐又喺透過寫食評遊戲中番嚟，有啲估唔到架，所以真喺喜出望外，等小弟慳番今年情人節餐飯錢。
Koh Thai有3間店，分別晌灣仔莊士敦道、中環雲咸街以及中環半山，我哋所中嘅情人節套餐要指定晌中環半山分店享用，雖然位處半山，仲喺晌摩囉廟街、些利街咁僻，但唔難搵，因為就晌半山行人自動電梯上到篤尾就喺。鋪面樓上原來喺露天位，擺放咗好多常綠植物，空間感強，甚有泰國風情，不過今晚天氣都仲有啲凍，都喺揀坐下層室內位好啲。而下層嘅格局屬酒吧餐廳，一室柔和燈光，富情調（依種場合就最考起小弟部DC仔，啲相影得差就請見諒），配襯米白色皮椅，好有情調，食情人節晚餐好啱氣氛，就算唔喺咩大日子，跟愛人嚟撐枱腳都好合適。

地下近門口位，對馬路都喺落地大玻璃！

鋪面樓上露天位

價值$660嘅情人節套餐分別有前菜、湯、主菜及甜品４道菜，份量啱啱好夠二人享用，因為除前菜，湯、主菜及甜品都喺一份俾兩個人食。
特色石榴汽酒
餐前先嚟1人1杯餐前酒濕潤一吓味蕾，「汽酒」下意識諗住會喺有氣葡萄酒之類，色澤金黃透徹，但見又無乜氣泡，呷一口，覺得應該似喺白酒，酒精度唔高，易入口。而沉積於底部粉紅嘅喺石榴糖漿，做雞尾酒常用材料，成份都喺啲糖漿、香精、食用色素，跟石榴無關，加上杯特飲唔喺雞尾酒，無將兩者溝埋，所以覺得啲石榴糖漿用嚟調色大過調味。視覺效果就好靚，味道就跟飲一杯白餐酒唔太大分別！
椰青椰汁鷄湯
雖然叫椰汁鷄湯，但淺白色嘅鷄湯味道跟冬蔭湯好相似，只喺辣度無咁重手。以原個椰青上枱，賣相標緻，打開「椰青蓋」，盛有滿滿嘅椰肉及鷄肉。濃郁嘅鷄湯混入椰漿、南薑、香茅打做，質感柔滑，既香帶辣又微酸，醒胃之餘，嚐到味道嘅層次，喺味覺嘅小測試；湯內配料可不少呀，鮮甜大大舊嘅椰青肉，嫩滑嘅雞柳肉，仲有陪襯嘅草菇，豐富味美，真喺有姿勢有實際，估唔到個湯咁好飲，絕對值得推介。
薯蓉蟹餅配泰式甜辣醬
本來餐牌嘅前菜喺「鮮炸豬肉蝦餅串配泰式甜辣醬」或「蛋包香炒鮮蝦雞粒」（二選一），不過臨時改咗為蟹餅，當然蝦餅蟹餅都無所謂。蟹餅賣相精簡，外觀、呎吋都有啲似麥記塊煎豬柳，香煎兩面再跟沙律菜伴泰式甜辣醬。蟹餅以薯絲拌蟹肉搓成，切開不單睇到薯絲絲絲幼細，口感比薯蓉多少少質感，不過蟹肉食落覺得稍為碎濕濕啲，而且好似唔喺好多；蟹餅本身都已經夠味，但蘸點泰式甜辣醬，咁就特別惹味，仲頗為刺激。
泰式炭燒羊架配青檸汁及藏紅花飯
主菜可以選泰式炭燒羊架配青檸汁及藏紅花飯或燒三文魚配紅咖哩汁及白飯，燒羊架或三文都OK，不過藏紅花飯就似乎較特別，所以主菜選上前者。賣相擺得幾立體，以西蘭花墊起3支羊架，再插上幾片薄荷葉，再配上倒出心形嘅藏紅花飯。羊架燒得有炭燒香，生熟度拿捏準，肉質軟腍又富肉汁，加上油香得嚟唔太羶，其實再羶啲小弟仲喜歡，整體個羊架做得出色；藏紅花飯又如何？藏紅花另一個名叫番紅花，除勻重量計，藏紅花算喺世界上最昂貴嘅香料，主要用作食物香料，整西班牙海鮮飯必備嘅材料，好似亦有啲醫葯，不過小弟對藏紅花止於依啲睇飲食雜誌嘅料，實際就未食過。加咗藏紅花嘅飯，味道都只喺多咗朕香料味，又唔覺有咩特突出，反對撈埋伴碟炸乾蔥仲有啲咬口，算小弟未到識領會藏紅花嘅層次。
炸香蕉配椰子雪糕
甜品又喺二選一，老婆對奶凍類甜品一向麻麻，所以紅桑子奶凍雖然喺餐廳經理David推介，但我哋都喺屬意炸香蕉配椰子雪糕，再者，感覺炸香蕉依道甜品較有泰式風味。香蕉熟透程度啱啱好，唔會有生生哋嘅酸味，又唔會有熟到又爛又腍嘅質感，咦！點解唔喺炸嘅，David送上枱時就解釋，因為個炸爐今日用咗好多，再炸香蕉依類甜嘢出嚟效果唔喺咁靚，所以就改用煮，都好無咁熱氣，因為今早食煎糕，晏晝飲茶又有煎糕，未來幾日啲團拜都喺煎啲乜糕物糕。香蕉用糖水煮過後，再淋上熱糖漿，蕉肉軟熟香甜甜到入心，夾埋香滑嘅椰子雪糕又有冰火效果，咁多糖漿唔好嘥，淋上雪糕就變咗焦糖椰子雪糕，真喺一道甜品幾種食法、幾種味道，正。
食物質素有水準，環境、氣氛亦唔錯，好似老婆所坐嘅小圓櫈，好挨又好坐。店員嘅招呼殷勤有禮，上菜速度合適，換碟、斟水亦恰到好處，尤其經理David，一臉泰國人面孔，以小弟小學雞英文幾驚溝通唔到，點知佢一出口啲廣東話幾正呀，說話溫文又面帶笑容，所以食完都同佢傾多幾句，問吓啲餸菜做法，佢就有問必答。
最後，仲有份好實用嘅小小情人節禮物，一門四傑anna lotan專業護膚產品：植物爽膚水、礦物潔面啫喱、舒緩保濕啫喱……等，雖然都喺啲試用裝，但都反應店家一份小心意。另外加多張甜品贈券，食滿$300額外送一客甜品，依個就擺明「利誘」再幫襯，在商言商好策略！再次多謝ufood及Koh Thai，讓我倆有個溫馨晚上！

個人評分
味道：8/10
環境：8/10
服務：10/10
抵食：8/10
平均每人消費：HK$330（食評遊戲獎品）

餐廳資料：
Koh Thai
中環半山些利街38號蘇豪38地下
2179 5779

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================