Secret Ingredient：新手？大顯身手！

聖誕節、情人節唔想太破費出街食？想俾個驚喜煮番餐俾另一半食？入過廚嘅人就知，以普通家常菜式而言，煮一餐飯動輒花一、兩個小時，唔好計逛街市、超市買材料，淨喺洗洗切切已相當費時。而且，煮啲複雜嘅菜式，最難就喺樣樣配料或調味料只買少少。如果你喺入廚高手，煮起上嚟都仲叫得心應手，煮得快啲，相反喺入廚新手，又有何能大顯身手？Secret Ingredient喺一間專售出口食材嘅網購概念店，佢嘅自煮晚膳，會為客人準備好晒一切所需嘅新鮮食材及調味料，外送直達，即使忙碌嘅朋友收工後仍能輕鬆優悠咁享受「快樂煮食」嘅樂趣。新手都一樣可以大顯身手！

簡說一下Secret Ingredient啦，登入店家網址，網購流程簡單易明，雖然暫時所送區域有限，但已包括港島大部份地方及尖沙咀區，亦可安排晌地鐵交收，對晌商業區工作嘅人嚟講，已非常方便。而菜式選項方面，分別有餐湯、沙律、主菜、甜品及啤酒、餐酒，要完成一份大餐絕對齊全，此外，每兩個星期就會轉款一次，保持一定新鮮感。滿$400免費送貨之餘（否則另收$25送貨費），只要當日指定時間前落單，仲可以同日送貨添。
要做到人人都可以優悠咁快樂煮食，洗切嘅步驟已有專人處理好晒，其次調味醃肉、分量配搭……等等，一一預備妥當，基本上按步就班，三幾吓手勢就會搞掂。就算最難嘅主菜，一般都唔會超過10個步驟，20-30分鐘之內就可以完成。OK，一切準備就緒，就等小弟一顯身手，完成4道菜嘅快樂晚餐啦！
Celeriac Soup with Apple Garnish $60
餐湯一般有3-4款選擇，如蕃茄濃湯、野菌忌廉湯、粟米湯。今次小弟揀咗個芹菜湯，平常較少飲，因為湯已預先煮好放晌真空袋內，只需置於熱水中翻熱再加入配料就可飲用，一份以700ml為標準，供兩人享用。不過，包裝盒內顯示為1公升，以小弟家中嘅湯碟，足可分到3份咁多，嚟多個老友都仲夠分呀！味道又如何？絕對唔錯，芹菜濃湯以芹菜、洋蔥、雞湯煮成，芹菜味幾清爽，口感幾細滑，加上啲青蘋果粒又唔酸，只喺啲麵包粒有少少腍咗，小弟仲私下加少少香草碎提提味，夏天飲都幾醒神。我心諗，如果改為凍湯，唔知效果會唔會仲過癮！
SI's Greek Salad $60
沙律獨沽一味，只有希臘沙律，$60一份同樣供兩人享用，不過份量之多，跟個湯一樣，3個人都夠晒分，我哋分好兩碟嚟食，仲可以剩番一小盒當第二朝早餐。個沙律都好易處理，已分好兩盒沙律主材料，有青瓜、紅燈籠椒、黑橄欖同紫洋蔥，全部切好晒，簡單撈埋，再加入油醋汁拌勻，最後撒上意大利蕃茜及羊奶芝士，就成為一道典型嘅希臘沙律。避免製作時出現混亂，店家好細心將食材及配料以不同英文字母區分，相信都甚少出錯。沙律入口幾清新、油潤，羊奶芝士唔太羶，相信大部份人都接受到。唯一挑剔喺太多橄欖，而橄欖味道又較鹹，如果減少橄欖嘅份量，相對又加啲蕃茄，我覺得味道更平均。
Succulent Bone-in Pork Chop & Pineapple Salsa with Sweet Potato and Black Bean Salad $275
基本上每次都會提供5款主菜選擇，有豬肉、雞肉、牛肉、魚類。小弟揀嚟喺一道名為「香煎豬扒配菠蘿莎莎伴蕃薯黑豆沙律」，$275為二人份，人多可揀四人份（$550）、六人份（$750.00），有啲主菜仲可以獨立淨加肉類部份，詳情上網睇睇就明白。每款主菜都有齊英文烹調指引，以及所需廚具提示，雖然指引喺以英文撰寫，但用詞淺易，況且圖文並茂，按圖慢慢一步一步咁做，都好少蝦碌出錯。值得一提，件豬扒除真空包裝外，仲有一個小冰袋「跟身」，務求減低食材變壞嘅問題，而店方亦鼓勵客人將小冰袋退回循環再用。

先講件豬扒，因為件有骨豬扒邊位帶有一截肥膏，所以煎出嚟感覺特別香，好油潤，雖然大件又厚身，但肉質咬落夠腍滑，富肉汁，而且已用辣椒、青檸汁醃過，自然更好味。菠蘿莎莎喺啲菠蘿同蕃茄粒，已一早預備好，只需臨尾倒上豬扒之上就得，味道辣辣甜甜，不過感覺似沙律一部份。而蕃薯黑豆沙律部份，成份有蕃薯、黑豆、車厘茄、火箭菜、紅椒、蔥、薄荷、醋汁，主要都喺要煮腍啲蕃薯粒，其他嘢搞埋一齊就可以喇，味道上喺一個帶甜味、又飽肚嘅沙律，薄荷跟醋汁令人感覺輕爽啲。其實啲蕃薯黑豆沙律我哋只喺倒咗2/3落碟度，因為份量著實太多，都怕食唔晒，可以Secret Ingredient晌份量上都俾得十足。
甜品有4款選擇：All American Apple Pie、Apple Crumble Pie、Wholly Heavens Pecan Pie、Spiced Pumpkin Pie，全部都喺向Tai Tai Pie Pie取貨，款款都喺賣$40，小弟要咗後兩者。由於食完沙律、餐湯、主菜已經好飽好飽，所以兩個甜品只好留番第二日下午茶。啲批又喺好易處理，放入焗爐120度火焗5分鐘就搞掂，每個批重130克，都幾重秤，不過小弟就鍾意搞少少花臣嘢，烘熱個批，加個雪糕球，咁先更滋味好食。
Wholly Heavens Pecan Pie $40
「大合桃批」唔喺指大批，喺想指啲合桃夠晒大粒，採用美國原粒大合桃放晌批面，賣相已經好有睇頭，味道更加一流，批殼酥脆，內裡填滿合桃碎粒同牛油餅碎粒，口感濕潤得嚟，滿口合桃甜香。
Spiced Pumpkin Pie $40
個南瓜批送到嚟批面有啲裂，其實店方建議所有批都可以晌室溫下享用，不過熱辣辣嘅批感覺總喺滋味啲。批殼滿滿牛油香，又有點玉桂味，而南瓜蓉柔軟，且滲出點點香料味，幾有趣喎。
由於份量之多，覺得以上整個餐都足夠3個人食，所以除起上嚟條數又幾划算，加上有得煮，又有得食，趁啲特別日子搞番餐又幾好玩。反正同樣4道菜，有齊沙律、餐湯、主菜、甜品，又要有質素，出街食都唔平啦！題外話講講，雖然店方強調所用嘅包裝都用上可分解嘅玉米粉製造，但眼見仍有唔少食材仍要倚賴膠盒盛載，為環保，小弟都盡量洗乾淨再用番。希望大家由「快樂煮食」開始，慢慢不再喺入廚新手。

個人評分
味道：9/10（因為自己有份煮）
環境：N/A
服務：8/10
抵食：8/10
平均每人消費：HK$237（試煮活動）

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================