一套戲有主角，又有配角，亦有啲行行企企嘅「茄呢啡」，有多兩句對白嘅就變咗「大茄」，今晚嚟到小桃咖啡室依個「小茄」度（因為店名英文喺little tomato啊），試過之後就知佢絕對唔喺「大茄」咁簡單。因為一向對樓上Café嘅印象，都喺俾人飲吓嘢，傾吓偈，hea吓，玩吓棋，打吓機，食物普普通通喺正常不過嘅事。之不過「小桃」晌食物嘅要求上，就跟一般樓上Café好唔同，所以今晚同朋友唔單止傾得開心，仲食得稱心。
位處波斯富街舊樓上嘅小桃，其實餐廳有個露台位，喺對到正時代廣場，秋涼睇吓街景望望人來人往幾得意，而除夕睇倒數就更喺一流，據老細講年年除夕個露台位都非常搶手。
從時代廣場望番去餐廳嘅外觀
入到餐廳，其實地方唔喺好大，大概30個位左右，但一室紅黑型格配襯，天花掛有幾盞水晶吊燈，都有啲情調架，由於依家天熱關係，間住餐廳同露台嘅摺門會長閂，但仍然可以走出去露台望望。
依個就喺搶手嘅露台位
此外，仲有個獨立房，可容納到8個人，所以人多不妨要求要個房，咁就更少騷擾。至於漫畫、棋子、各類遊戲玩意，就放晌大廳書架之上，仲可以掟飛標，悉隨尊便。
上文略略提過小桃嘅食物水平好非一般樓上Café，單單一個大餐牌，由沙律、小食、薯皮、三文治、飛碟、薄餅、湯、意粉、飯、招牌豬肋骨、甜品……一應俱全，達50多款；而飲品餐牌亦不徨多讓，啤酒、餐酒、雞尾酒、港式、咖啡系列、奶昔、可可、沙冰、汽水特飲、綠茶系列、紅茶系列、意式梳打、花茶系列……近乎應有盡有。
而且，顧及唔同人嘅需要，仲有形形色色嘅套餐，單單晚餐，就有基本嘅「小桃晚餐系列」（$128-$168）、「2人開心套餐」、「2人至尊份量套餐」，以及多款按人頭增加食物份量嘅「小桃元氣套餐（Set A）」（$138位）、「小桃華麗套餐（Set B）」（$168位）、「小桃醉人套餐（Set C）」（$198位），可以講句，比起一啲西餐廳嘅選擇都仲要多，而且不拘於任何一國菜系，其實老細都有解釋，小桃定位喺bar & restaurant，不過餐廳前身喺樓上café，佢又無刻意改裝修啫。
小桃晚餐系列
小桃晚餐系列
2人開心套餐
2人至尊份量套餐
小桃元氣套餐（Set A）
小桃華麗套餐（Set B）
小桃醉人套餐（Set C）
我哋品嚐嘅小桃華麗套餐（Set B），包括是日沙律，小食共有6款（3-6人可選2款，7-9可選3款，10人以上可選4款），主菜共有7款（3-5人可選2款，6人以上可選3款），再加甜品及每人一杯特飲，收費人頭計每人$168（+10%）。
![bowl]()
奧利奧女神（散叫價$58）
奶昔選擇有4款：可可情人（朱古力）、冰島仙子（薄荷）、粉紅白雪（草莓）及奧利奧女神（Oreo曲奇），睇中奧利奧女神覺得佢可能幾得意。奧利奧奶昔夾上朱古力漿做成一間一間，杯面一抹忌廉，賣相幾靚。飲落奶味重，不過，Oreo曲奇其實都只喺朱古力曲奇，味道跟飲朱古力奶昔差唔多，但就較淡味嘅朱古力。
![bowl]()
青蘋果沙冰（散叫價$48）
同大家傾成晚口水都乾，所以後尾都多點一杯沙冰試試，沙冰嘅選擇較多，有十多款。依款青蘋果沙冰勁冰凍，口感清爽，消暑仕佳品。
其他朋友嘅餐飲
花茶系列 - 梅花釀
![bowl]()
是日沙律（小桃田園沙律，散叫價$68，加大3-4人分量$128）
大大碟嘅田園沙律，有露筍、薯仔、車厘茄、粟米、羅馬生菜、火箭菜，配以芝麻醬、黑醋，帶少少和風口味，用料新鮮，作為餐前開胃菜真好。
![bowl]()
法式蒜蓉包（散叫價$32 / 3件）
雖然個Set B叫喺法式蒜蓉包，但實為散叫餐牌中嘅芝士蒜蓉包，外表可能有啲平凡，但一咬脆到無朋友，包面塗上蒜蓉之後再加上芝士碎烤焗，甘香滋味！
![bowl]()
法國酥皮田螺（散叫價$48 / 4粒、$88 / 8粒、$168 / 16粒）
相中嘅份量喺按我哋人頭計，所以跟散叫嘅份量有出入。造型小巧嘅酥皮田螺孖住孖住咁整齊排列，外層酥皮熱辣辣，鬆脆富牛油香，雖然田螺肉味道唔算好濃，但配合埋溶透嘅芝士，小弟仍認為值得推介。
![bowl]()
魁北克鋪天薯條®配醬燒豬肋骨（散叫價$198半條，$298全條）
鋪天薯條（Quebec Poutine）喺店家嘅一個系列，仲攞埋名字嘅專利，其實佢喺加拿大魁北克省嘅一種小吃，「鋪天」就喺晌面面加上醬汁嘅意思。鋪天薯條共有5款味道，今次所試就喺肉醬鋪天薯條，熱辣香口嘅粗薯條，伴著秘製醬汁、莫蘇里拉芝士，豈止回味再回味吖！而另一主角，一大條燒豬肋骨外觀焦香實叫人睇得期待，豬肋骨肉質非常鬆化又有肉香，晌濃濃嘅烤醬下，外皮帶點碳燒味，不愧喺得獎菜式！
鋪天薯條系列
![bowl]()
意大利卡邦尼意粉（散叫價$88）
意粉晌散叫餐牌中亦有5款，單價為$78-$108。賣相平實嘅卡邦尼意粉，估唔到味道突出，印象中常見嘅卡邦尼都喺較白，但小桃嘅卡邦尼就偏黃，除淡忌廉，仲加入蛋黃調汁，口感濃郁柔滑，所以味道才咁搶。再者，意粉入口煙韌有咬口，又條條掛滿汁，雖然唔喺用上所謂正宗嘅巴馬火腿，但配上鹹香嘅煙肉，我都覺得夠使好味。
![bowl]()
特色鰻魚炒飯（散叫價$98）
飯類稍為少選擇，得3款，賣$88-$108。晌度有鰻魚炒飯食，認真估唔到，更難得喺個炒飯唔喺得個樣喎。珍珠米飯粒分明，食落爽身，內裡仲加埋白菌、粟米粒、蟹柳同炒，而燒鰻魚入口油潤，質感軟綿，做得比想像中要好。
![bowl]()
小桃蛋包飯拼香煎雞扒（散叫價$108）
個蛋包飯可以講喺好睇唔太好食，由店員晌蛋包飯上即席以茄醬畫上“喵喵”圖案，得意可愛又傳神，蛋皮亦煎得好薄，配以一大件厚雞扒，伴雜菜，賣相攞晒分。不過，雞扒既嚡又韌，小弟負責切開都有啲唔容易，此外，帶有唔輕嘅雪味真喺中正要害。結果，蛋包飯食晒，雞扒就有剩。
![bowl]()
甜品拼盤
本應個餐包小桃啤梨芝士餅，不過老細幫我哋改為甜品拼盤，當中有意式芝士餅、馬卡龍（朱古力味及士多啤梨味）、啤梨芝士餅、布朗尼及士多啤梨雪糕。意式芝士餅餅底富酒香，馬卡風芝士打得軟滑，面面唂咕香濃；馬卡龍無想像中咁甜，帶點濕潤煙韌；啤梨芝士餅喺幾款中較得我歡心，因為少甜，而且味道清香；布朗尼就嫌佢軟身咗，朱古力味又唔夠濃；士多啤梨雪糕相比起就似配角啫！
甜品餐牌
餐後再跟老細交流，原來「小桃」可以出到咁多款食品並非獨力硬撐，背後仲有晌同區紮根多年嘅「薯仔屋」及「凡高廚房」作支援，好似甜品就喺凡高出品，幾間小店都喺老細嘅「仔仔」，見佢一晚走勻幾間鋪，落力非常，多謝店方款待之餘，更祝幾個仔仔不斷成長茁壯，更上一層樓！
個人評分
味道：8/10
環境：8/10
服務：9/10
抵食：8/10
平均每人消費：HK$185（試食邀請）
餐廳資料：
小桃咖啡室 Cafe Little Tomato
銅鑼灣波斯富街83號波斯富大廈2樓D室
2808 0789
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
8
小桃咖啡室 Cafe Little Tomato：小茄絕對唔喺大茄咁簡單
小桃咖啡室 (前身為Maiddate女僕餐廳酒吧)
旮旯 The Glock
旮旯 The Glock
入素 Green entrance （KCC）
T.O.P.商場地庫
La Famille (海港城海洋中心店)
滔滔甜品(井財街)
JUICY Fresh Juice Bar