海洋公園

20 APRIL 2014(SUN)

頭兩日嘅復活節假期都留左係屋企冇乜特別活動，所以趁今日依個好天氣，我地三口子又入去海洋公園玩一轉啦~

坦白講海洋公園真係一年三百六十日都係咁多人，加上今日又係假期，所以都預左多人。不過去到海洋公園雖然都係多人，但又覺得都OK，唔算太迫係要排吓啦！

因為小小豬好想搭纜車，但搭上山嘅人龍又真係多人的嚇C你，所以我地就先搭火車上山，玩一轉先再搭纜車落山~

上到山第一個目的地，當然去探吓啲動物。嚟左咁多次，都係第一次入嚟睇海豹嗰啲呀~

不過今日啲海獅海豹唔太活躍，成日都唔見人，所以唔係好吸引到小小豬。反而一粒珍珠就吸引到，係度不停研究呀~

之後行過大海底隧道，終於見到好多唔同種類嘅小動物係度遊嚟遊去，睇吓佢兩父子睇得幾投入~

哈哈哈...估唔到俾我影到一張型型地嘅小小豬剪影呀~

係離開水族館時，門口有一個捐款機，小小豬一見八達通個LOGO就好興奮，之後經大肥豬解釋之後，知道係用嚟捐款支持小動物，所以佢又話想捐。見佢咁認真，所以就俾佢捐一隻啦(當然係捐最平嗰款，出少少力啦)~

路過店舖，又嚟攪攪陣，搵啲公仔影吓相先~

之後當然要去埋睇企鵝啦~

今日啲企鵝勁活躍，成日係水入面游嚟游去，又跳上水面。嚟咁多次都只係第一次係咁，所以唔止小小豬，就連我地兩個都睇得勁興奮呀~

繼續我地山上行程，當然就係去玩攤位遊戲。講真...以小小豬咁嘅身手，都真係冇乜可能會擲到獎品。不過，既然小小豬主動提出話想玩，大肥豬都話俾佢試吓，等佢可以參與之餘，等佢嘗試多啲唔同嘅活動，亦都可以感受吓輸贏呀~

玩到攰攰地，有人要咩咩仔呀~

原本都打算去睇海洋劇場，不過時間唔太啱，所以依個活動就留返下一次嚟時再睇，我地去搭纜車落山啦~

個傻豬仔真係好鐘意搭纜車，睇佢幾開心周圍望~

落返山第一時間就係去醫肚先，我地去食雞脾呀~

原本都好想去探海馬王子，不過真係勁多人，起碼要排成個幾鐘，大肥豬話唔好浪費啲玩嘅時間，所以最後都冇睇到，係門口到此一遊。希望下次再入場時可以少啲人啦~

之後我地就去小小豬最鐘意嘅地方，咪就係兒童王國玩。第一時間就帶小小豬去玩嗰個彈彈青蛙機， 小小豬都係第一次玩，所以我都陪埋佢一齊，以防佢驚嘛。點知依個大膽豬完全唔驚，仲唔俾我捉住佢，全程都笑晒口咁，真係大膽到冇朋友，下次再玩就唔洗我陪啦~

之後去玩揸車車，十蚊幾分鐘真係好唔抵呀~

之 後就去左玩彈彈床，依個遊戲真係俾左個小驚喜我地。因為依個遊戲係需要小朋友自己排隊、除鞋擺鞋，自己入去玩。開頭都有少少擔心小小豬唔合作，點知佢又真 係做得到，我地係遠處望住小小豬全程自動波，乖乖排隊又同工作人員合作，真係有少少安慰，睇嚟我地平日都係有啲過分保護呀~

見佢咁叻仔，就同佢去玩轉小火車~

之後就去探佢個海獅朋友仔啦！可能已經睇左好幾次，小小豬都知道個程序，所以一到工作人員邀請小朋友上台同海獅玩時，個傻豬仔就即刻舉手(仲要舉得幾高哦)。雖然最後小小豬都係冇俾邀請，不過見佢咁主動都係好嘅開始呀！

雖然冇得同海獅玩，不過可以同海獅影相都一樣咁興奮呀~

最後我地仲玩埋木馬添~

開開心心又過左一天，今日小小豬嘅表現真係唔錯，尤其係彈彈青蛙同彈彈床嘅表現都俾到驚喜我地。見小小豬玩得咁開心，所以大肥豬話要嚟多啲，最重要係希望有一次可以俾邀請上去同海獅玩呀！

其他博客區
※※ SINA ※※
※※ MyBB星級Blogger ※※
※※ WeShare ※※
※※ She.com ※※
※※ theZtyle ※※
※※ SeeWide ※※

 

 

MY FACEBOOK~


MY WEIBO~

 

MY E-MAIL~