第三天
白川鄉就好似一個童話世界，白雪襯托住薑餅屋，同故事書入面既世界一樣，感覺似歐洲，更加似童話；今年世界各地天氣特別反常，香港冬天熱左好耐忽然又好凍，白川鄉呢道都唔例外，今年天氣異常咁熱，往年一般十一月就會開始積雪，而且經常落雪會越積越厚，不過今年就慘啦，去到一月中都因為天氣熱雪溶得快而積唔起雪，去到一月尾有寒流南下先叫有啲雪咋，今次可唔可以係白川鄉見到雪都係未知之數，正正因為咁所以我計劃左去兩次白川鄉，希望可以大啲機會見到白川鄉雪景啦
事不宜遲，今日7點半就出發；金澤天氣依然唔好，繼續落雨，心諗白川鄉距離金澤幾十公里應該唔會落雨掛？
首先去便利店買早餐，有好多飯團揀花多眼亂
又再返到金澤站，去白川鄉既巴士就係金澤站開出
白川鄉巴士係二號位置上車，已經有乘客比我更早黎到排隊，呢班車要預先買好車票先可以上車，琴日已經拎左車票而家可以等車lu
車未到，快啲食左個飯團先，不過食完之後出現另一個問題，朋友想拎啲垃圾去垃圾桶但係火車站出面同入面都搵唔到，最後我個背窶暫時做住垃圾桶先
去高山白川鄉既車到啦，下面有行李位可以放行李
上到車要跟編號坐；部車又係開晒暖氣好焗，好彩咁岩我坐尾二個行，咁岩後面又冇人坐，我可以偷偷地打開小小窗吹風唔怕影響到人
由金澤去到白川鄉全程都係高速公路，行車穩定坐得好舒服
自從穿過隊道進入山區之後，窗外變成白色世界，我期待既雪景出現啦，沿路去到白川鄉都係好靚既白雪，只不過天氣都係唔多好
離開高速公路即係就到白川鄉，見到咁多雪唔怕冇雪啦
平時得閒會睇呢個live cam check住白川鄉，一月中之前雪都唔多粒，係一月尾先有啲積雪睇下咋
http://shirakawa-go.org/livecam/
經過1小時5分鐘車程，去到白川鄉荻町落車
一落車係巴士站旁邊就見到合掌屋啦
好多年前就想去白川鄉睇雪，經過咁多年我終於黎到啦！心情好難形容，總之我終於踏入一個期待已久既童畫世界！而且今日係一個特別日子，2月14號丫，哈哈哈哈哈哈哈哈
巴士站旁邊係旅客中心，入面有locker放野；我已經係搭金澤第一班車，但都冇高山黎既車咁早，locker已經full晒
冇locker都唔怕，可以請旅客中心職員幫手寄存，價錢理論上同locker係一樣，朋友就係咁用￥400寄存左個喼
時間尚早，白川鄉遊人仲未好多；過左條橋就可以進入白川鄉中心範圍，好多合掌屋係對面等緊我
望返去頭先落車既巴士站
過橋啦！呢道天氣都係唔多好，一路落住雨，仲時大時細，我都懶得開遮，用外套帽笠住個頭就算，好彩件外套又OK冇入水bor，個背囊罩就有小小入水
雪山若隱若現，仲有一股仙氣出現
「白川鄉位於岐阜縣西北部白山山麓，是四面環山、水田縱橫、河川流經的安靜山村。那裏“合掌造”（茅草的人字形木屋頂）式的民宅，114棟連成一片，1995 年被指定爲聯合國教科文組織的世界文化遺產。」
白川鄉係二十幾年前已經被列為世界文化遺產，咁特別既合掌屋除左呢道同北歐可以搵到之外，我諗只有係故事書入面先可以搵到
合掌屋之所以叫合掌屋係因為屋頂好似一對差唔多合埋既手掌（我鐘意叫薑餅屋多啲），目的係防止屋頂過度積雪，等雪可以係太多既時候自動跌落，唔怕壓垮屋頂，始終白川鄉每年都會落大雪，積雪厚到要用米計算
穿過白川鄉荻町中間既大銜，正前方山上就係可以見到白川鄉全景既觀景台，而家就向觀景台進發
和田家係呢道其中一座過百年歷史，最大又保留得最好既薑餅屋，而且仲可以入去參觀，我暫時要趕路上山唔入去住lu
和田家旁邊就有巴士上山，收費應該係￥200，見個山咁矮自己行上去仲好啦，我選擇行上山（如果大雪就可能封路冇得行）
見條斜路唔斜好似唔難行
白川鄉應該好多冇落過大雪啦，屋頂都積唔到雪，感覺上係差緊啲野，還好地下都有好多雪，但啲雪就唔係想像中咁軟綿綿，已經壓到好實
雖然雪唔多，白川鄉此終都係靚，可以收貨啦？
好多仙氣
今日天氣此終唔好，又落雨又多霧，都估到上到山唔會睇到靚景啦，無論點都好都要上去既
到上山既路口
小型薑餅屋
條路唔係好斜，可以話係好易行，慢慢行10分鐘都可以上到去
一路行一路影相，行得越高風景越靚
差唔多到頂啦
山頂個觀景台好大霧，上到黎就入左間鋪頭行下，希望一陣啲霧會散啦
行左陣出黎，都算清楚左小小；呢道有個攝影攤位幫人影相，佢會用自己相機幫你影之餘又會用你既相機幫你影（佢個部影得靚好多），行出來時張相已經勁快晒好出來等你睇同買，當然買唔買係自己意願佢唔會迫你，我自知樣衰就冇買啦，朋友就買左，一張收費￥1200
入去時姐姐已經講明唔買都得，而且佢地好正，問左你係香港人之後會用廣東話同係講野，真係好識做生意，哈哈^^如果唔係咁大霧睇得唔清楚我都想買返張，sorry...
出面就係咁
等多陣都叫好啲，可以望到下面啲薑餅屋
臨走前終於等到個靚啲既景啦，只係幾分鐘時間又變返大霧lu
時間差唔多，夠鐘落山
係道買左條唔知咩食就走lu
好多人排隊等車落山，我覺得自己行落去可能仲快
望返上山頂觀景台係比層霧遮住，唔怪得上面視野咁差啦
用左20分鐘，由山上觀景台行到返去遊客中心旁邊既巴士站，要等車暫時離開白川鄉
係白川鄉逗留左大約兩個半鐘，準備去另一個同係世界文化遺產，又係睇薑餅屋而聞名既地方「五箇山」，個道一樣有好靚既風景，但相對白川鄉就少好多人認識，今日成日咁得閒一於去睇睇
