Zoe

Zoe 位於中環皇后大道中18號新世界大廈1期1樓2號舖，是間出售特色曲奇的麵包西餅專門店。以下係探險家《山區麵包王》為大家作出的實地報導：「Zoe：好友狂嚐曲（33）」正所謂禮尚往來，小弟不時都請同事食曲奇，依趟輪到同事請番我。一喺唔請，一請就試吓啲有名氣嘅品牌，同事所買嘅曲奇，原來喺嚟自法式餅店Zoe跟蘇施黃合作嘅 「Zozi七彩鹹味曲奇」，與其叫七彩，不如叫彩虹就仲靚啲喇。睇番附件張卡仔，原來依個Zozi曲奇禮盒有兩款口味，一鹹一甜，長形餅罐喺鹹味，仲化身為彩虹七色，數過一次，真喺紅橙黃綠青蓋紫齊晒，色彩繽紛，鮮艷搶眼到爆，而且口味方面新奇，極有賣點，；另一款圓形餅罐喺甜味，屬較正常嘅模樣，口味亦較大路，如朱古力、綠茶、咖啡……等等。打開包裝罐，左右兩排，話就話有7款味道，其實每排共有8塊，即喺有一款口味會重複，唔知喺隨機定「專燈」，兩排重複嘅都喺橙色（辣椒）。好在公司同事唔多，而且，平時亦好關照吓佢，所以，試完3塊，之後有淨再叫我試多3塊，唔客氣咁前後試咗6款口味。始終喺Zoe出品，水準有一定保證，口感頗為鬆脆，普遍嚟講無乜牛油香，可能要顧及各種味道嘅突出性。第一次試嘅喺：藍色（黑欖）：曲奇內滲雜粒粒碎黑欖，不過，量少而唔喺好覺有黑欖嘅味道；青色（羅勒）：羅勒始終喺一種香草，用嚟做曲奇算喺穩打穩紮，食落有羅勒香味，但唔算太強；紅色（煙肉）：曲奇混入煙肉碎，脆脆哋又鹹鹹哋，感覺算幾特別。而第二次試嘅喺：黃色（咖喱）：只有咖喱味，卻無咖喱嘅辣同香，個人覺得普普通通啫；橙色（辣椒）：比較期待嘅一款口味，既然都喺用色素，唔知點解辣椒味唔用紅色，夠火辣辣嘛，而煙肉其實可以用番橙色。雖然叫「辣椒」，辣味只喺點到即止；紫色（紫菜芝麻）：紫菜味例有一點，但睇樣，落芝麻慳得緊要，芝麻香欠奉。無試到嘅喺綠色嘅開心果，綜合嚟講，睇見啲賣相有好幾款螢光咁色，而成份你都會發覺有唔少化學嘢及色素，味道上又未有預期嘅突出，有啲雷聲大雨點少嘅感覺，所以，只可以講喺貪新鮮一試無妨，再試無謂。再次多謝同事咁客氣，又唔介意俾我影完一大輪相先食！個人評分味道：6/10環境：- /10服務：- /10抵食：- /10平均每人消費：HK$0（禮物）