香港人愈來愈愛喝咖啡，尤其是近年，喝咖啡已經逐漸發展成為一種生活品味。筆者雖然並不是咖啡迷，但間中也會和朋友去 coffee shop 食件 cake，歎番杯咖啡，hea 上半天。



早前友人邀約筆者去灣仔一間以優質咖啡為主打的店子《La Station》小聚，據說這間新開的 café，來頭不少，原來其中兩位老闆，正正就是法式甜品店《Paul Lafayet》的第二代，而且店子除咖啡外，其它食品選擇亦非常豐富，由 Croissant、Bagel、Quiche、Sandwiches，以至《Paul Lafayet》極受食客歡迎的 Crème Brulee 等甜點都有供應。







原來《La Station》是位於太源街路口，近皇后大道東一邊，地點旺中帶靜，而店子地方雖然細細，但佈置充滿特色。裝潢以歐洲火車站為藍本，圓拱形樓底配球形吊燈，再加上紅磚色的港鐵紙皮石牆身、及用金屬銅管和燈泡打造而成的港鐵路線圖，設計極具心思，令人眼前一亮。









先走近 counter 看看，玻璃櫥櫃裡的三文治和糕餅，款款賣相都好吸引，尤其是三文治，材料豐富，用作午餐輕食最啱；而幾款蛋糕亦焗至色澤金黃，未吃已教人垂涎。和友人商量後，決定先點飲品，原來牆身上那個巨型的黑色餐牌，是仿照車站班次的顯示板製作而成，與餐廳的主題非常配合。細心研究，飲品除了多款主打的咖啡，如 Mocha、Americano、Latte 之外，還有熱朱古力、檸檬汁、smoothie 和濾泡咖啡等等供應。

心大心細，最後還是決定按靚女店員推介，點了 Piccolo Latte ($32) 及 Blackbeard Secret。前者鮮奶分量下得較少，所以喝起來咖啡味道頗濃，更能突出咖啡香，配合個杯的骰嘅造型和咖啡面頭精緻細膩的拉花，令人一試愛上。至於後者 Blackbeard Secret ($40)，原來據店員稱，這杯賣相黑漆漆咖啡特飲，裡面除了有雙倍分量的濃縮咖啡外，仲加入咗可樂、檸檬汁同肉桂，飲落有啲似薑啤，甜酸中又帶點兒甘澀，味道非常複雜，值得一試。

由於大家都唔算好肚餓，所以決定只點一件鹹味的蛋批 Ham and Cheese Quiche ($40) 一齊  share，一於留肚吃 Loaf Cake。蛋批外表帶金黃，用上火腿同芝士做餡料，餅皮咬下鬆化，而且邊位烘得非常香脆，入口充滿蛋香，惹味又有咬口，吃得人心滿意足。

蛋糕點了 Lemon Cake ($25) 及 Hazelnut and milk chocolate cake 各一件，前者檸檬蛋糕，食落雖然唔算特別濕潤，但質感輕盈鬆軟，而且入口滿是檸檬的清新香氣，味道酸酸甜甜，好 light 又夠  fresh，滋味十足，很適合女生享用。至於我和友人都一致讚賞的 Hazelnut and milk chocolate cake ($25)，入口朱古力味道非常濃郁，加上蛋糕入面放咗唔少榛子果仁，食落有咬口之餘又甜美不膩，放在嘴裏品嘗，味道著實討人喜愛，有說不出的興奮與愉悅的感覺。據說店裡的糕餅全部都是來自 Paul Lafayet 餅房，下次想找個地方喝杯咖啡，吃件美味的三文治和蛋糕，看來又多一個好地方了！

============================================

感謝 mjqueen7e 提供以上資料

mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong

============================================