這一陣子，室外氣温動輒就超逾三十度以上，而且天氣經常作打風，害得怕熱的我，連週末也不想外出覓食。星期六本想到住處附近的茶餐廳吃頓快餐，但老公竟提議到康怡廣場的 Pizza Hut 吃下午茶，那就隨他的意思好了。

雖然已提早咗 15 分鐘出門口，到達商場地下層，內裡幾間食肆包括「東湖」、「元氣」、Pizza Hut 等，門外都已站滿輪候的食客，幸而只需等約 10 分鐘，便可入座。由於愛美的兒子要留在家中整妝，稍後才到，我和老公就先點了兩份下午茶餐。年輕的男店員突然問我們是否有渣打信用卡，原來用這卡結帳，可享買二送一優惠，但翻閱檯上所有餐牌，也沒發現提及此項折扣，幸虧這小伙子以客為本，那麼為客人著想，細心提點，真讓人窩心。

至於所點的茶餐，其實都是一般大路貨色，跟餐的所謂意大利蔬菜湯，其實咪即係帶點蕃茄風味的羅宋湯，不過個湯入口頗酸，而且湯身甚稀，幸好內裡菜蔬煮得夠腍，但整體來說，味道還只是一般。另一客忌廉雞湯，反而較得我心，雖然內裡磨菇不多，但勝在質感夠稠，入口夠濃夠 creamy， 水準不俗。

這個菠菜雞皇長通粉 ($51)，味道都算唔錯，每條通粉均沾上白汁，加上煮得軟硬適中，真係恰到好處。筆者尤其喜愛通粉面頭的杏片，份量下得頗多，而且極之香口，配上軟腍的雞肉、健康的菠菜，感覺十分良好。至於兒子點的葡汁雞皇焗飯 ($51)，見個樣幾有誠意，似模似樣，雖然我一向都無乜飯癮，也吃了幾口。好可惜個葡汁吃來味道實在過淡，只是空有其色而沒有其味，猶幸內裡雞肉仍算軟滑。

另外，個千島海鮮薄餅 ($56)，老公就揀咗個薄脆批底，配料方面，完全說不上豐富，蝦、魷魚、蟹柳，份量簡直少得令人有點沮喪，好彩個餅底烤得非常香脆，口味甜甜酸酸的，食落都幾開胃。

飲品方面，我和兒子都愛喝汽水，當然選了可無限 refill 的百事和忌廉，至於老公點的凍檸茶，用個有耳玻璃瓶盛載，頗為特別，而且夠曬大杯，可惜飲落茶味極淡，味道只是一般。幸好這次埋單有買二送一優惠，所以也十分抵食。

============================================

感謝 mjqueen7e 提供以上資料

mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong

============================================