由於住處附近有兩條戲院院線，所以要看電影的話，其實是非常方便，根本無需搭車外出。星期五晚預訂了晚上十點三的戲票，不想去太遠吃晚飯，到太古城的大食代最方便不過，雖然沒甚麼特別出色的美食，但貪佢食肆眾多，任君選擇。

先在場內巡一圈，愛吃香口食物的老公就敲定了這間「台灣美食」，因為睇中了這份鹽酥雞扒套餐 ($40)。這份餐包括有鹽酥雞扒、茄子肉燥飯、迷你蚵仔煎和是日例湯。

先試試鹽酥雞扒，外層沾上脆漿，炸得香脆但又不至於吃到成口粉，內裡肉質唔算太嫩滑，肉汁不多，水準當然不比台灣夜市的高，好掛住台灣的豪大大雞扒呀。但整體來說，還是炸得不俗，起碼脆漿夠薄脆，外皮酥香又不太油膩，只是略嫌味道偏鹹。

至於碗茄子肉燥飯，味道就一般，賣相有點求其，配料亦非常之少，茄子只得四件，肉燥更加是只得幾粒，滷蛋又係得半隻，加上肉燥汁唔多，茄子煮得不夠軟腍，肉燥唔夠香醇，滷蛋醃得又唔夠入味，感覺上真的不太討好，唯一較正常的只有飯粒，入口清爽兼有米香。

不過最激氣的還是這份迷你蚵仔煎，明明購票時老公再三指明要煎得燶些，點知取餐時，其外表一點也不金黃，入口竟然還是不熱，肯定不是即煎的。其實就算是一早整定，點都應該先翻煎一吓才給客人嘛，更何況我們事先聲明要煎得久一點，而收銀哥哥還口口聲聲說無問題，點知…. 唉，真可惡。至於這份迷你蚵仔煎，蠔仔極少，入口淡如開水，與在台吃的那種甜中帶鹹、鹹中帶辣的繽紛滋味，相去甚遠。

至於是日例湯就係紅蘿蔔瘦肉湯，味道清甜，雖然唔夠老火，材料也不多，但飲落頗有家庭式的味道。

============================================

感謝 mjqueen7e 提供以上資料

mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong

============================================