原來吉之島這間分店係未有人寫過食評,咁就唔客氣喇,請容小妹在此獻獻醜。我有時常上open rice睇食評嘅習慣,故此發現 Cheese Pizza都有幾多好評,不過由於佢啲店舖大部份都係位於新界區,所以一直都提不起勁去覓食,直到發現康怡吉之島竟然開咗間分店,便的起心肝去試試。
其實今次已經係我第四次嚟呢度買外賣,礙於家人食量不大,所以今次仍然維持叫一個輕便套餐 ($95), 另加一件炸雞 ($10).
輕便套餐包普通批一個 + 意粉/焗飯/炸雞三件/小食 (任選一款) + 飲品兩罐/蒜蓉包/餐湯 (任擇一款)
啖啖肉Pizza --- 有辣肉腸、火腿、牛肉、豬肉、煙肉、雞肉,啱曬屋企啲食肉獸,批底厚得嚟又夠鬆,好味
炸雞 --- 啲炸雞的確好似其他分店內嘅食評咁講,炸得好脆,而且雞肉好Juicy,咬落去啲汁會不斷流出嚟,一定要揾嘢接住食、味道調校得幾好。連老公都讚話炸雞就好味過KFC,而pizza 就好食過Pizza Hut
蒜蓉包 --- 呢個我反而覺得普通咗啲,得個脆字,唔夠香,Pizza Hut嘅蒜蓉包就比佢做得好
而家此分店做緊優惠,外賣自取買滿$100有八折,所以今晚呢餐只係$84,超值。不過優惠唔知做到幾時,而且店員有時又唔係日日都放個優惠牌出嚟,所以購買時可以先問問啲店員,佢地都頗為友善。
吖!差點忘了張印花咭。原來每次惠顧滿$20可得滋味印花一個,5個印花可換炸雞一件、10個換下午茶餐一客、15個換標準薄餅一個、20個換二人套餐一客。臨走前個店員問我級咗印花未,我問番佢乜嘢印花,佢先話我知有上述優惠;我話我之前幫襯過三次都無人話我知有此積分咭,個哥哥仔見我咋型就主動級多2個印花俾我,真識做。
============================================
感謝 mjqueen7e 提供以上資料
mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong
============================================