6 觸目二段丼

一連四日復活節長假期已經開始咗，相信有不少市民早已出外旅游嘆世界。至於筆者，本來約好妹妹一家人在灣仔集合，一起去掃墓，點知妹夫臨時有事，所以決定將行程推遲一天。由於兩口子已經人在灣仔，所以決定先在附近吃頓午飯，之後四處逛逛才回家。從手機 Apps 附近餐廳欄內找到一間叫《弘》的食肆，瀏覽了當中幾個食評及照片，發現原來餐廳主打日式丼物，其中招牌食品「二段丼」即兩層的刺身加米飯料理，賣相吸睛，反正還沒想到吃甚麼，姑且一試。











原來餐廳是位於灣仔道 221A 地下，其實筆者之前曾到訪過同一位置，記得當時店子名稱叫《豚兵衛》，唔怪得之個門面咁熟口熟面啦！按門內進，店裡設計同對上一手食店分別不大，都是以平實舒適為主，左右兩邊牆身各自排了張長長的梳化座，而走廊位則擺放了數張拼合式四方木製椅桌，併配旁邊的吧檯位，裝潢既簡約又唔花巧。



翻開餐牌，食物好簡單，都是以刺身飯為主，而當中最觸目的自然是兩款貴價的二段丼，分別為造型極之浮誇的「松葉蟹二段丼」同埋刺身放到幾乎滿瀉的「極上海鮮二段丼」，兩款售價均為 $288。另外餐牌上還有定食、卷物、刺身、沙律、前菜、飲品和甜品等可供選擇。

同老公商量後，決定點一凍一熱，即一客「極上海鮮二段丼」同一客「炙本海鮮丼」，另加一款前菜打開胃口。先送上桌的這一客是芥末八爪魚 ($48)，以蟹籽作點綴的八爪魚，水準唔錯，質感好滑，而且夠曬彈牙，吃起來既煙韌又帶點刺鼻，實在讓人又愛又恨。





接著輪到極上海鮮二段丼 ($288) 登場，雖然個丼是以兩層設計上桌，而且陣容都幾鼎盛，但講真其實實物沒網上照片咁震撼，不過用料都好豐富，擺到幾乎滿瀉。先研究一吓海鮮丼上段的材料，內容包括有三文魚腩、北寄貝、藍鰭吞拿魚大腩、間八、帆立貝、蟹鉗和海膽等刺身，再加上甜蛋同青瓜，分量十足。店員幾細心，會建議我地先食較淡味的白身魚，例如間八，然後才吃味道較濃郁的魚生，如三文魚。





先品嚐上層的魚生，其實味道大致上都唔錯，幾款刺身雖然並非全部厚切上碗，但可以一次過食到咁多款，實在大滿足！個人最欣賞的，當然是厚身的三文魚腩，入口不但甘香肥美、而且油脂豐腴，的確值得一讚。另外間八都唔錯，可能是當造期的關係，所以吃起來份外鮮美，清甜誘人。而老公就特別鍾情蟹鉗同海膽，讚前者肉質紮實飽滿、吃起來爽口彈牙；至於後者呈金黃色的海膽，雖然味道唔算好香濃，不過亦很甘甜鮮美，配著軟腍又富蛋香的甜蛋吃，一啖魚生、一啖飯，精彩！

食完上層就輪到吃下層，細看飯面，鋪滿蟹膏、吞拿魚腩蓉、香蔥伴藍鰭同三文魚籽，而中間竹筒就放咗溫泉蛋。先吃一口蟹膏，入口黏黏的，而且味道帶點微腥，幸好吞拿魚腩蓉，水準唔錯，不但肉色粉嫩、攪碎後吃油脂更豐盛。店員更教路，其實吃這下段丼，食法好簡單，只要先將中間的溫泉蛋用匙舀起，傾入飯面後弄散，與丼內的食材撈拌後一起吃便可。立即試試，食味果然唔同咗，入口即時變得好滑溜，口感極佳。



也喝了跟隨二段丼附送的味噌湯，雖然味道無乜特別，材料只有豆腐同海帶，但入口暖暖的，而且不太鹹，幾順喉。

至於炙本海鮮丼 ($128)，材料就比較簡單，只有火炙三文魚、火炙赤鯛、火炙間八同火炙帶子；四款當中，至愛當然是三文魚同帶子啦！前者三文魚腩，肉質肥美，經火炙後變得外熟內生，鎖住鮮味之餘，內裡的脂肪更呈半溶狀態，咬落魚油輕濺，滿足至極！而後者帶子，輕燒至外香脆、內嫩滑，以甜蛋伴著吃，將帶子的鮮味升華。餘下兩款赤鯛同間八，其實味道都唔錯，經火炙後，入口亦鮮甜帶焦香。

整體來說，海鮮用料新鮮，而且飯量唔算好多，如果是兩個女生來吃的話，建議點個二段丼，再加客小食，已經足夠。

============================================

感謝 mjqueen7e 提供以上資料

mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong

============================================