8 東瀛風味@京林屋

熟識筆者的朋友都知，我絕對不是個抹茶控，所以當早前得知來自日本京都、擁有二百多年歷史嘅過江龍抹茶甜食店《京林屋》登陸香港後，也沒特意前去拜訪。不過後來獲吃過的朋友告知，店裡的抹茶甜品，不但甜美可口、嗒落亦不會過於苦澀，反而帶點淡雅清新，應該會幾適合我；既然友人推介，就找個週末來試試看。













店子座落於銅鑼灣希慎廣場 6 樓，內裡面積不大，約有四、五十個座位，環境以柔和的淺木色為主調，看起來既簡潔又舒服，配上店內兩個靠牆的特設和式茶座和入面的仿榻榻米座椅，裝潢甚具東瀛風味。















見來到時，時間尚早，店裡食客不多，所以請服務員為我們安排較清靜的仿茶室和坐。安頓後，先翻閱餐牌，原來餐廳設最低消費，每位客人最少要惠顧一杯飲品或一客食品。至於抹茶甜食，選擇都幾豐富，而且全部分門別類，有甜點、雪糕、雪山、芭菲、蛋糕套餐等，甚至連麵食都有得供應，而且每款食物均圖文並茂，一於坐低逐頁揭、慢慢揀。



由於連午飯也還沒吃，所以決定先點客麵食打底，原來選擇都唔算太少，有抹茶蕎麥麵、讚岐烏冬及稻亭麵，而且仲可以揀冷吃或熱食，就一於在蕎麥麵和烏冬內，各選一客試試。先吃熱讚岐烏冬 ($68)，粗圓的烏冬以熱湯浸著，配料唔算豐富，只得兩片魚餅及紫菜絲等，但質地食落唔單止滑嘟嘟，細嚼下更可嘗到烏冬的小麥香，味道不俗。









接著就輪到品嘗冷抹茶蕎麥麵 ($78)，原來凍食嘅蕎麥麵，水準都唔錯，雖然唔算好滑溜，但吃起來實淨彈牙，尤其是沾上鰹魚汁後，味道不但清爽鮮美、而且入口更散發出悠悠的抹茶香，吃罷清涼透心，令人暑氣全消，用來配小香菇和蘿蔔蓉吃，既可口又滋味。







雖然筆者並非抹茶粉絲，不過一場來到，無理由唔點番客抹茶甜品，選了這款法式聖馬克抹茶蛋糕配自選茶 ($108)。據說蛋糕是由日本直送到港，焦糖脆面下是的抹茶海綿蛋糕、椰子慕絲及抹茶慕絲，幾款食材層層相間，吃起來口感既輕盈又層次豐富，配上伴碟的幼滑抹茶雪糕、煙韌軟糯的白玉丸子和大粒粉甜的紅豆，無論味道和賣相，都一樣咁討人歡心。





由於得知店子亦是焙茶的始組，所以決定再加點一客迷你焙茶芭菲配自選茶 ($98)，芭菲以高身闊口玻璃杯盛載，除了主角焙茶雪糕外，面層還放有白玉丸子、紅豆及焙茶啫喱，並以唧花的甜忌廉作點綴，賣相吸睛。先吃一口呈褐色的焙茶雪糕，質感好幼滑、而且茶香濃郁，奶味 Balance。再舀起旁邊滑溜的焙茶啫喱，原來杯子下端還載有香甜的雲呢拿雪糕，雖然這杯是迷你版，但用料竟然咁豐富，令人吃得既滿足又稱心。



至於跟甜品的兩客自選茶，就分別點了凍玄米茶和凍桃味焙茶，前者色澤明亮、帶玄米的自然香氣；而後者雖然焙茶味唔算突出、但入口帶清幽桃香，很適合女士品嘗。雖然這天吃的不多，但所點的麵食和甜品，水準確實不俗，看來日後去銅鑼灣又多一個蒲點了！

================================

感謝mjqueen7e提供以上資料

mjqueen7e的網誌: http://www.openrice.com/zh/gourmet/reviews.htm?userid=66478&city=hongkong

================================