觀塘工廈覓食記

友人識飲識食，每逢放假，最愛的節目，就是四出捐窿捐罅，搜尋美食。早前見她造訪了觀塘工廠區一間樓上 Café《Go Inside Kitchen》，用膳後不但大讚店主致力推動「聾健共融」的理念，而且更身體力行，聘請聽障人士負責侍應工作，以增加他們跟食客的溝通機會；加上店裡食物水準唔錯，實在值得支持。既然朋友極力推介 ，碰巧這天要去觀塘辦點事，就一於趁空檔，兩口子先去吃頓午餐。

















餐廳座落於觀塘道時運工業大廈 5 樓，甫踏進店，即被一室淺木色調所吸引。原來店內地方很大，樓底頗高，而且環境寬敞闊落，加上用餐區只簡單地以木檯配襯白色膠椅，沒有花巧的裝潢，讓人感到舒服自然。趁時間尚早，食客不多，先快步於室內巡了一圈，牆身上的幾何圖案竟然是用木條拼配而成，設計果然有心思。再往餐廳另一端走，原來外面還設有一個露台，雖然地方不大，但坐下來吹吹風，欣賞一吓周邊的風景，感覺亦蠻不錯啊！





安座後先細看餐廳，午市有二人套餐供應，包頭盤、餐湯、主菜、意大利飯、甜品及飲品，優惠價 $208；另外還有可供一人享用的 Set Lunch，共有八款選擇，價錢由 $62 至 $138 不等，已包括精選餐湯，主菜及餐茶。如果仍嫌唔夠喉嘅話，亦可以加錢點埋喜馬拉雅山岩鹽溫泉蛋  (+$8)、田園沙律 (+$12) 或黑松露蜜糖雞翼 (+$15)。





筆者是個愛魚之人，而老公就被這張店長推介的相片所吸引，就一於各自點選心頭好，再一起分享。開餐前先揀飲品，筆者選了凍檸檬茶 (跟餐)，而老公就揀咗杯凍莫卡咖啡 (+$12)，前者飲落有檸檬嘅自然果酸味，而且酸度適中，好 Refreshing；而後者 Iced Mocha，咖啡味不太濃，反而朱古力味比較突出，對朱古力迷如我是件好事。



是日餐湯是黑松露忌廉湯，先舀起一匙試試，入口雖然沒有雜菌蓉的嚼感，但湯身稀稠度適中，而且菌香味濃郁，配埋面頭的忌廉，令湯品喝起來更加滑溜，水準的確不俗。至於即烘的多士，拿上手仍熱辣辣，咬下好香脆，沾少許黑醋汁吃，食味亦同樣令人滿意。







西班牙黑毛豬豬鞍架 ($138) 接著送上，嘩！沒想到原來這件豬鞍架咁厚身，而且底面都煎得色澤金黃，賣相非常吸引。立即切開一試，味道果然在水準之上，豬鞍的肉質不但軟腍細緻，而且細嚼下更可嘗到黑毛豬本身的橡果香，加上伴吃的蜜糖蘋果汁，嗒落帶陣陣清新香氣，用來配搭豬鞍一起吃，入口微甜不膩之餘，肉味亦更臻完美。記得不要錯過旁邊的椰菜、茄子、翠肉瓜和脆香薯格，食味不俗，吃罷十分飽足。





至於我點的香煎三文魚扒配刁草忌廉汁 ($98) 亦屬驚喜之作。雖然未知廚師是否用上慢煮方法烹調這道菜式，但這客三文魚水準的確唔錯，魚皮夠厚、煎得脆口甘香；而魚肉的口感亦軟綿輕柔，吃起來嫩滑無比，配刁草忌廉汁吃，Creamy 得來又夠滑溜，食味一流。



店員見我倆吃得津津有味，提議不如餐後加些甜品作結，是日精選甜品竟然多達 13 款，選擇豐富得令人咋舌。老公揀了3.7 牛乳布甸 (+$12)，而我就選了朱古力沙加餅 (+$12)，甜品端上後見每款竟然有兩份，初頭還以為是店員搞錯，原來據服務員稱，$12 的確是兩人分量，實在慷慨得令人驚訝！再細心欣賞，兩款甜品側邊竟然還用上朱古力醬唧咗 Pattern，擺碟夠曬精美。先嘗一口牛乳布甸，入口奶香 Creamy，而且質地軟滑有彈性；而朱古力沙加餅，味道亦超讚，巧克力味濃香得來又唔會覺得好膩，加上蛋糕的的骰骰，就算一人獨享兩件，應該都無難度。

其實近年觀塘工廈的確開了不少新 Café，但水準參差，好似這間咁肯係食物上花心思的，確實值得加分！

================================

感謝mjqueen7e提供以上資料

mjqueen7e的網誌: http://www.openrice.com/zh/gourmet/reviews.htm?userid=66478&city=hongkong

================================