Snowdonia National Park是位於英國威爾斯西北部的國家公園，總面積達2130平方公里，成立於1951年，是英國繼 峰區(Peak District )和 湖區(Lake District)之後的第三個國家公園。Snowdonia National Park覆蓋了Gwynedd 和Conwy郡的部分地區，當中包括小鎮「Betws-y-Coed」，該鎮擁有一大片鄉郊林地及許多19世紀的建築物，包括商店、酒店和教堂，寜靜舒適充滿度假氣氛。
旅居英國 • 動態移民 – Day 14
<< Llandundno>>
繼續上一篇Llandundno的行程，沿著碼頭旁邊的小徑行上Great Orme山頂。
Great Orme是由石灰岩形成的小山，屬於Llandundno市內的自然保護區，設有多條路徑能登上山頂。山腰有個數千年歷史的銅礦場，4月旅遊季節開始便可以入內參觀，但現在關閉。
上山段路都辛苦架，要上升200m，行大約45min，仲一邊行一邊開始落雨，幸好雨勢不算十大，沒有影響行程。
天氣時晴時雨，明明落住雨但上到山腰時又見藍天，不過唔夠5min又再落雨，英國的天氣就係變幻無常。Great Orme Mines – 銅礦場的外圍，冇得入去都可以在外面看看。要3月中才重開，只係爭些少日子都無緣入去參觀了。
沿另一條大路下山不走回頭路，可以望返Beach of Llandundno和小鎭。
登山纜車在山腳起點，仲未開始營業啊。
落山之後還有時間，可以慢慢歎杯茶食件蛋糕，英國人都很喜歡這樣無無聊聊地飲茶食Cake。
Love-To-Eat – Llandundno這茶室超級有人氣，現在過了繁忙時段才啱啱有位，剛到埗時全店爆滿。
客人全部都老到嘔，後生仔女唔知去晒邊呢。
Victoria Cake (£2.95) – 蛋香欠奉，好甜而且有少少雲呢拿味，密度高口感有點兒鬆散，屬於普遍的英國風味；Chocolate Cake (£2.95) – 朱古力味濃厚，一樣係冇蛋香和好甜，口感亦一樣，只係勝在環境好；Cappuccino(£3.25)；Earl Grey Tea (£2.5) – 茶和咖啡都完全冇特別，一般英國茶室的質素。
食完Tea去超級市場Sainsbury's和M&S買些水果蔬菜補給，乜嘢平就買乜嘢啦。
Sainsbury's今日最抵有香蕉(每隻£0.25)、番茄 (£0.8)、熟蝦肉150g(£2.75)、Rosé(£4.7)、蘑菇(£1.2)和生菜(£0.55)。
菲力牛排(Dry Aged Fillet Steak)(£12.18 - 203g) – M&S(馬莎)在英國都算係較高檔的超級市場，貨品會較新鮮和另類，價錢亦較貴。在這裡見到較貴的牛扒DA Fillet Steak，買一塊今晚試。
另外再買了 三文魚腩(£4.75)，M&S的三文魚腩比其他超級市場肥美新鮮，買2件明天吃。
乘16:10的巴士No.19返Betws-y-Coed，繼續用1bws Ticket。
<< Betws-y-Coed>>
返到去返Betws-y-Coed還未天黑，而且有少少藍天，便趕快行一行這小鎭其他景點。
Afon Llugwy – 穿過小鎮的河流，美得像仙境一樣。Afon是威爾斯文，解作河流。![]()
![]()
![]()
Pont-y-Pair Bridge – 屬於Betws-y-Coed的大景點，配上河谷及沿河小屋構成了絕美的圖畫，在Snowdonia National Park 內不難找到同類的石橋。
Sapper’s Suspension Bridge – 橫跨康威河(River Conwy)，連接Betws-y-Coed火車站及對岸的吊橋，路過時的搖動幅度相當大，刺激好玩。
St Michael's Church – Betws-y-Coed火車站旁邊的河畔教堂墓地，建於 14 世紀，是Betws-y-Coed最古老的建築。
Betws-y-Coed火車站 – 入黑前一段時間已經很冷清，因為最後一班火車已經開出了。
回到火車屋No.2 Railway Cottages，今天落完雨，日落天色變咗紫色和粉紅色，靚得太過份了。
晚餐照舊由小太熊做大廚，我做大爺。
巴瑪火腿 • 五色芝士 • 熟蝦肉 • 車喱茄 – 今晚的頭盆很豐富，中午買的蝦肉估唔到又平又鮮甜，抵食；在倫敦超級市場買的巴瑪火腿只係一般質素；雜錦芝士唔好食，下次唔再買。
蘑菇雜菜湯 – 用料新鮮的美味靚湯。
DA Fillet Steak – 中午在馬莎買的貴嘢，對這塊牛扒好有期望，一口咬落，牛味好淡，肉質粗鞋，好很難食，對英國超級市場的牛扒極度失望，下次唔試了。還是西生菜好食啲。
晚餐成本每人大約£10.8，可惜今餐唔好食，嘥咗個胃。
旅居英國 • 動態移民 – Day 15
今日大雨。
早兩日天文台Apps預測今日天氣是全星期最好，最大機會全日天晴，所以決定今日挑戰威爾斯最高峰 斯諾登山(Snowdon)(1085m)。要登上Snowdon最方便可選擇從Pen-y-Pass或Llanberis起步，約2.5hr便可攻頂，回程可以自選一個落山點，兩個地點也有巴士No.S2接駁。因為網上有人話Llanberis起步上山的路段較其他路線易行，考慮到巴士班次太少及尾班車很早出車，今次選擇從Llanberis來回山頂，好處是隨時也可以估計回到起點的時間，遇上特發事件時容易決定應否回頭。壞處係比Pen-y-Pass起步要上升多200m左右，因Pen-y-Pass位處高地。
早上06:30起身煮早餐比小太熊食，輪到佢歎，可以瞓多半個鐘。
今日早上陽光普照，心情都靚晒，估計一定能順利登頂了。
沙典魚出前一丁 • 巴瑪火腿太陽蛋 • 熱伯爵奶茶 – 完全係豪華版的港式茶餐，食到小太熊咀舔舔，每位成本要£3.3。
行5min到St Mary's Church前的巴士站等車，巴士班次太疏，早上只有這一班車。
St Mary's Church – Betws-y-Coed的主要景點，建於1873年，是威爾士教會一座很活躍的教堂，屬於英國二級保護建築。
Bus No.S2 – 巴士09:11到站，只遲了1min。今日來回共坐2程車，我同司機講想買 1-bws Ticket，司機反問我的行程，佢知我今日只係來回都坐Bus S2之後，便介紹我買Adult Return Tickets，只係£5，比1-bws Ticket 平£0.7，英國的巴士司機真係好人。
巴士路過Pen-y-Pass，在這裡可以清楚看見 威爾斯最高峰Snowdon(1085m)，登頂可以在這站落車，或者好似我咁在Llanberis起步。
<<斯諾登山>>
巴士09:45到達Llanberis，起步時好似幾多雲啊。其實登頂可以坐纜車的，不過要等下個月旅遊季節開始才營運，現在只可以用腳行上去。
纜車總站就在Llanberis巴士站不遠處，是上山必經之路。
今日行的山徑叫Llanberis Path，基本上差不多全程都係慢慢上斜，很少樓級，路闊易行，斜度也幾穩定。估唔到今日都有唔少人行山，基本上有一半時間都會見到其他人，不會冷冷清清鬼影冇隻。
09:50準時起步，向未知的前程進發。
沿馬路迴旋處上山行300m便見到Llanberis Path的起點。
行15min便到達整段路唯一的補給站 Coffee Shop - Pen Ceunant Isaf，跟著唔會再有補給站了。
羊仔識得爬上草堆，幾有趣啊。
再行多10min 便到這閘口，開始正式進入山徑。
起步時明明還好好太陽的，但不夠半個鐘天色便越來越黑，好彩今日預咗要雨中行山，全身都防水架。
羊仔都行山，英國羊真健康。
天氣好淡爭持，烏雲中不時出現陽光，希望太陽可以殺退淡友，重現藍天。
行唔夠1hr便烏雲密佈，淡友完勝殺盡牛証，開始有點雨粉，幸好沒有大雨，防水風褸完全頂得住。
行了約 1hr來到纜車橋底，下次來一定要坐纜車。
落落吓雨又見番藍天，比佢玩到人都癲。
上山的速度比自己預期更快，完全跟到官方時間，按照走勢應該可以成功登頂。
10:55到達小石屋，離遠見到以為可以入去休息避寒，原來鎖晒門窗的。
頭半段上山路比較少人，但不知為何過了石屋之後越來越多人。
太陽耐不耐便現一現身，不過都只係曇花一現。
不斷上山的路段依然又闊又易行，預備了的行山杖都唔駛用了。
11:20到達山中綠水湖泊Llyn Du’r Arddu，這處風景是全段山徑最靚的。
開始括起強風，加上氣溫只有7度加上雨粉，好凍好辛苦。
