有時冇時間，又想快但有變化，好自然就係梳三手辮，不過當日日都係三手辮又開始有D悶啦，點樣可以令三手辮有變化呢？呢個我叫做華麗的三手辮，因為出嚟嘅結果比普通三手辮花俏好多，但又唔係要做多好多工夫，又唔駛再用好難嘅技巧。呢次係用於普通三手孖辮上，如果用於梳髮髻，將會成為好有貴氣嘅髮式。
首先好似平日梳三手辮咁將頭髮分成三束頭髮，再由最側邊兩束頭髮中各抽出一小束頭髮，將呢小束頭髮以三手辮方式由頭編到尾。
之後將小三手辮搭於三束頭髮其中一束上，再將三束頭髮編成三手辮，要注意係將小三手辮展現於前面，就好似係頭髮加上一條織帶咁樣，建議只編兩條小三手辮，令到個花樣可以突出又不至於太過花多眼亂。想個效果明顯D，可以於編小三手辮時加入小絲帶等配件，令到小三手辮更搶眼。
