以前都有講過,李生以前參加醒獅隊,玩咗廿幾三十年,休息咗八九年,兩三年前因為對仔女而復出,每年農曆新年期間佢地都會好多活動,除咗今年2月11日嘅農曆新年花車巡遊,連續兩個星期六都會去多華人商舖舞獅,為醒獅籌募經費,好多華人主理嘅商舖都好鍾意舞獅活動,因為好意頭,唔通有人問你舞獅嚟拜年,帶來吉利,會有話唔要唔好咩?甚至有D老外都好鍾意睇,剛過嘅星期六就係西岸醒獅隊嘅籌款日,李太因為趕帶豬扒妹去考校區嘅語言試,唔記得帶相機,呢日所有相都係用手機影嘅,當然冇相機咁清咁靚,但都算捉到當中精彩部份。
其中一個大商戶就係SF Toyota,估唔到成個Richmond區有四間Toyota店,全部屬於同一個老細,每年佢都會叫醒獅隊去表演。第一站就係Geary Blvd.上呢一間SF Toyota,首先放好炮仗先,
跟住開鑼鼓,就三隻獅子一齊開舞啦,紅白藍三色獅子煞是好看,當中舞獅有男有女。
點燃鞭炮,三獅齊拜,最後嘅大鞭炮爆完後,舞獅表演就結束,三隻「獅子」好有禮貌拜別。
感謝 花旗太太 提供以上資料
花旗太太的網誌:http://rosemaglive.blogspot.hk/